O qədər müasir bir zəmanədə yaşayırıq ki, günü-gündən eşitdiklərimiz, gördüklərimiz bizi artıq təccübləndirmir. Məsələn, kişilərin qaş alması, dodağına və üzünün digər nahiyələrinə silikon etdirməsi, makiyaj çəkməsi az qala adi hala çevrilib. Artıq Azərbaycanda da belə kişilər artmaqdadır. Bəs görəsən qadın kimi kişilərin bəzənib-düzənməsi, qaş alması və sairə İslam dinində necə qəbul edilir?
İlahiyyat üzrə fəlsəfə doktoru Əkrəm Həsənov açıqlamasında bildirib ki, dinimizə görə kişilərin özünü qadınlara bənzətməsi, yaxud da qadınların özlərini kişilərə bənzətməsi qadağan olunub. Bu barədə mənbələrdə kifayət qədər xəbərlərin olduğunu deyən Ə. Həsənov qeyd etdi ki, Allah təala Qurani Kərimdə kişilərin ayrı xüsusiyyətləri, qadınların ayrı xüsusiyyətləri olduğunu, onların bir-birindən fərqləndiyini bildirib: "Həmçinin Lut peyğəmbərin dövründə qadınlara bənzəyən kişilərin olduğunu, kişilərin qadınlarla əlaqə əvəzinə, kişilərlə əlaqədə olduğu üçün onları yerlə yeksən etməsini bizə çatdırıb. Bu ayələrə uyğun olaraq da çox hədislərdə Allahın peyğəmbəri kişilərdə kişilik xüsusiyyətlərinin olmasını bildirib, qadınlara bənzəməyin haram olmasını xəbər verib. Peyğəmbərimiz kişilərə bənzəyən qadınları və qadınlara bənzəyən kişiləri lənətləyib.”
İlahiyyatçı vurğuladı ki, istər kişilər olsun, istərsə də qadınlar dinə görə özünü gözəlləşdirmək üçün slikon qoydurmaq, bədəninin müəyyən hissəsini əməliyyat etdirmək haram edilib: "Allah təala belə edənləri Qurani Kərimdə şeytanların qardaşları adlandırıb və bu səbəbdən belə edənləri cəzalandıracağını bildirib. Allah təala Peyğəmbəri vasitəsi ilə bu əməlin insanın dünya və axirət üçün təhlükəli olacağını xəbər verib.”
Amma Ə. Həsənov bir məsələni də qeyd etdi ki, peyğəmbər gözə faydalı olduğu üçü yatanda sürmə çəkməyi müsəlman kişilərə tövsiyə edib. Bizdə isə belə adətlər yoxdur: "Hətta belə söz eşidən olsa dərhal qəzəblənər ki, bu nədir özünüzdən gündə bir hökm çıxarırsınız? Ancaq dində o qədər firqələr vardır ki, özlərindən İslam dininə yeniliklər əlavə ediblər. Bizim qeyd etdiyimiz məsələ dinə əlavə və yenilik deyil. Dediyimiz məsələ Allah təalanın Məhəmməd peyğəmbərə öyrətdiyi gözəl bir adətdir ki, Allahın Rəsulu bunu edib.”
İlahiyyatçı bu fikrini hədislərə əsasən belə əsaslandırır: "İbn Abbasdan rəvayət olunur ki, Allah rəsulu buyurdu: Sürmədən istifadə edin, o gözlərin görməsinə bəsirət verər, kipriklərin tüklərini də bitirər. Digər bir hədisdə isə buyurur: Yatacağınız zaman ismidlə sürmə çəkməyinizi tövsiyyə edirəm. Çünki o görməsinə bəsirət verər, kipriklərin tüklərini də bitirər. İbn Macə İbn Abbas deyir ki, Rəsulullahın bir sürmə qabı vardı, hər gecə bir gözünə üç, digər gözünə də üç dəfə sürmə çəkərdi (Tirmizi, Əbu Davud, Nəsəi). Yatanda gözə faydalı olması üçün kişilərə sürmə çəkilməsinə icazə verilib.” (Analitik.az)
Xəbərdən istifadə edərkən istinad etmək vacibdir.
