Qafqaz Universiteti, Azərbaycan Dövlət Pedaqoji Universiteti və Türkiyə Respublikasının Hacettəpə Universiteti birlikdə ümummilli lider Heydər Əliyevin anadan olmasının 92-ci ildönümünə həsr olunmuş "Müəllim hazırlama siyasəti və problemləri” mövzusunda beynəlxalq konfrans keçiriblər.
Qafqaz Universitetindən verilən məlumata görə, konfransa ABŞ, Pakistan, İran, Filippin, Ukrayna kimi xarici ölkələrdən iştirakçılar qatılıb. 232 müəllifin 175 məruzəsi dinlənilib, müzakirələr aparılıb.
Konfrans iştirakçıları öncə Fəxri xiyabanda Heydər Əliyevin məzarını ziyarət edərək məzarın önünə əklil və gül dəstələri qoyublar. Elə həmin gün ADPU-nun böyük zalında beynəlxalq konfransın açılış mərasimi keçirilib. Konfrans ikinci günü isə plenar iclaslar bölmələr üzrə Qafqaz Universitetində davam etdirilib.
Beynəlxalq konfransda Türkiyənin Hacettəpə Universitetinin, Qafqaz Universitetinin, həmçinin Ankara Universitetinin, Sakarya Universitetinin nümayəndələri,Təhsil Nazirliyinin , Bakı Dövlət Universitetinin, Azərbaycan Dillər Universitetinin (ADU), Bakı Slavyan Universitetinin, Azərbaycan Texniki Universitetinin, Sumqayıt Dövlət Universitetinin, Azərbaycan Müəllimlər İnstitutunun, Qərb Universitetinin və digər ali təhsil müəssisələrinin professor-müəllimləri, Azərbaycan Milli Elmlər Akademiyasının (AMEA), Təhsil Problemləri İnstitutunun, Bakı Pedaqoji Kadrların İxtisasartırması və Yenidən hazırlanması İnstitutunun alim və mütəxəssisləri iştirak ediblər.
Hacettəpə Universitetinin professoru Celal Bayrak bildirib ki, hər üç universitet birlikdə mövcud potensialdan istifadə edib birlikdə müəllim hazırlama prosesini həyata keçirəcək.
Bağlanış tədbirində çıxış edən professor Əydər Ağayev qeyd edib ki, beynəlxalq konfrans Heydər Əliyevin anadan olmasının 92-ci il dönümünə həsr olunub: "Qonaqlar bir daha şahid oldular ki, Azərbaycanda elmə dövlət qayğısı yüksək səviyyədədir. Prezident İlham Əliyev daim elmə və elm adamlarına diqqət, qayğı göstərir”.
Qeyd edək ki, konfransın son günü konfrans iştirakçılarının Bakı şəhərinə ekskursiyası təşkil edilib. (apa.az)
Xəbərdən istifadə edərkən istinad etmək vacibdir.
