Bildiyiniz kimi, Sumqayıtının işləyən əhalisinin böyük qismi işləmək üçün hər gün Bakıya gedib qayıdır. Bunu nəzərə alaraq, vaxtilə Sumqayıtın bir neçə nöqtəsindən (9-cu mkr. şəhər poliklinikası, Heydər parkı, Mərkəzi bazar, Avtovazğal, "Simurq" şadlıq sarayının yaxın. və s.) Bakıya marşrut avtobusları işləyirdi. Həmin avtobuslar qayıdanda Sumqayıt əhalisini şəhərin bir neçə nöqtəsi üzrə qaytararaq bərabər paylayırdı.
Bu ilin yanvarın 21-dən fəaliyyətə başlayan ekspres avtobuslar yalnız 1 xətt - Sumqayıt Avtovağzalı ilə Biləcəri qəsəbəsindəki Mərkəzi avtovağzal üzrə işləyir. Müasir şəhərdə yaşayan insan gündəlik həyatında mobilliyini təmin etmək üçün 2 çox ciddi amili nəzərə alır: səyahətə (gediş-gəlişə) sərf etdiyi vaxt və səyahətin qiyməti (gediş-gəlişə xərclədiyi pul). Bakı-Sumqayıt arasında vağzaldan-vağzala üsulu ilə təşkil edilən qanuni ictimai nəqliyyatdan istifadə zamanı bu amillərin hər ikisinin ən uğursuz variantı ortaya çıxır. Tərslikdən hər iki şəhərin avtovağzalı bir-birinə tərəf ən yaxın çıxışda yerləşir. Bu üsulla Bakıdan Sumqayıta qayıdan sərnişinlərin böyük qismi məcburdur ki, şəhərin daxili nəqliyyatından da istifadə etsin. Bu isə orta statistik sərnişinin bu iki şəhər arasındakı səfər müddətini bəzən 2 saata, səfər qiymətini isə bir az da bahalaşdırır.
Sumqayıtın şərq hissəsi - mikrorayonlar tərəfində yaşayan əhalinin ekspres avtobuslardan istifadəsi nə dərəcədə əlverişlidir? Olmazdımı ki, Sumqayıtın minimum 2 başına - dediyimiz hissəsinə də avtobuslar hərəkət etsin? Bununla bağlı bir plan varmı?
Məsələylə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumun mətbuat katibi Tural Orucov Xeberle.com-a deyib ki, Bakıdan Sumqayıt şəhərinə yola düşmək istəyən vətəndaşlar paytaxtın müxtəlif ərazilərindən həmin istiqamətdə fəaliyyət göstərən avtobus marşrutlarından istifadə edə bilərlər:
"Sumqayıt şəhərinə daha tez çatmaq üçün vətəndaşlar "Avtovağzal” metrostansiyasına gələrək müasir və komfortlu "Neoplan” avtobusların fəaliyyət göstərdiyi 595 nömrəli ekspres marşrut xətti, habelə Saray qəsəbəsindən keçməklə 503 nömrəli müntəzəm marşrut xətti ilə gedə bilərlər. Bakı-Sumqayıt şosesində yaradılan xüsusi hərəkət zolağı isə sərnişinlərin rahat və sürətli daşınmasını təmin edir.
Sumqayıta paytaxtın "Azadlıq prospekti” metrostansiyasından da yola düşmək mümkündür. Metrostansiyanı Sumqayıt şəhərinin Sülh küçəsi ilə əlaqələndirən 123 nömrəli müntəzəm marşrut xətti üzrə gündəlik 15 avtobus sərnişinlərə xidmət göstərir.
Qeyd edək ki, Bakı şəhərindən Sumqayıt şəhəri və Abşeron rayonunun müxtəlif ərazilərinə müntəzəm avtobus marşrutları ilə gündəlik təqribən 80 minə yaxın sərnişin daşınır.
Hazırda Bakı şəhərinin istənilən ərazisindən avtobus və metro vasitəsilə "Avtovağzal” metrostansiyasına və Beynəlxalq Avtovağzal Kompleksinin Nəqliyyat Mübadilə Mərkəzinə (HUB) getmək mümkündür. Qeyd edək ki, HUB-dan Bakı və Sumqayıt şəhəri və Abşeron rayonunun müxtəlif istiqamətlərinə 27 marşrut üzrə 260-dan çox avtobusla sərnişin daşımaları həyata keçirilir”.
Elşən Yəhyayev
Xəbərdən istifadə edərkən istinad etmək vacibdir.
