Bu gün Sumqayıtın şəhər statusu almasından 73 il ötür.
Xeberle.com xəbər verir ki, əhali sayına və sənaye əhəmiyyətinə görə Bakıdan sonra ikinci böyük şəhərdir. Paytaxtdan 35 km şimalda, Abşeron yarımadasında, Xəzər dənizinin qərb sahilində düzənlik ərazidə yerləşir. Hacı Zeynalabdin, Ceyranbatan, Corat, Yeni Corat, Novxanı, Kimyaçılar, İnşaatçılar, Kotej, Yaşma və Saray qəsəbələri, Yaşıl dərə, St. Sumqayıt, Sarıqaya, Xəzər bağları yaşayış massivləri, 20 mikrorayon və 65-dən çox şəhər məhəllələri inzibati əraziyə daxildir.
Son statistik məlumata görə, Sumqayıt şəhər ərazisinin əhalisi 347,8 min nəfər (məcburi köçkünlər istisna olmaqla) təşkil edir. Əhalinin sayı ilin əvvəlindən 1,0 min nəfər artıb.
Ərazisi 94,7 kv.km olan şəhərin əhalisinin bir kvadrat kilometrə düşən sıxlığı 3672 nəfər təşkil edir ki, ölkənin başqa şəhərlərinə nisbətən əhalisi ən sıx olan şəhərdir.
Tarixçilərin fikrincə, müasir Sumqayıtın yerləşdiyi ərazidə qədim dövrlərdə midiyalılar məskunlaşıblar. Şəhəri tikintisi zamanı torpaq altında qazıntı işləri görülərkən qədim yaşayış məntəqəsinin və karvansarayın qalıqlarına rast gəlinirdi. Sovet İttifaqı Abşeron yarımadasını ağır sənaye mərkəzinə çevirmək qərarına gəldi. Bu məqsədlə Abşeronda ikinci bir sənaye mərkəzi tikmək istəyirdilər. İlk tikinti işləri 1938-ci ildə başlandı. Lakin İkinci Dünya müharibəsinin başlanması ilə əlaqədar olaraq şəhərin tikintisi dayandırılır. Tikinti işləri 1944-cü ildə yenidən bərpa olunur. Şəhərin tikintisində azərbaycanlılar ilə yanaşı, müharibədə əsir düşmüş almanlar da işlədilirdilər. 1949-cu il noyabrın 22-də Azərbaycan SSR Ali Soveti Rəyasət Heyətinin qərarı ilə Sumqayıta şəhər statusu verilib. İstilik Elektrik Stansiyası yanında qəsəbə olaraq yaranan Sumqayıt qısa müddət ərzində böyük sənaye mərkəzinə çevrildi.
Xəbərdən istifadə edərkən istinad etmək vacibdir.
