Yeni Azərbaycan Partiyası İdarə Heyətinin üzvü, Sumqayıt şəhər təşkilatının sədri Ramiz Hüseynov, Qartal Tikinti Firmasının direktoru Şahin Məmmədov şəhid Çevik Polis Alayının çavuşu Ramil Şirinovun ailəsini ziyarət edib.
Xeberle.com xəbər verir ki, təşkilat sədri Ramiz Hüseynov Müzəffər Ali Baş Komandan, Prezident İlham Əliyevin rəhbərliyi ilə Silahlı Qüvvələrimizin 44 günlük Vətən müharibəsində əldə etdiyi tarixi Zəfərdən bəhs edib. O, qeyd edib ki, tariximizin qürur duyulası səhifələrinin biridə 19 sentyabr 2023-cü ildə Azərbaycan Ordusunun Qarabağda həyata keçirdiyi lokal xarakterli antiterror əməliyyatlarında yazdıqları qalibiyyətdir. Bu əməliyyatlarda 205 şəhidimiz Qarabağımızı bütövləşdirərək şəhadətə ucaldı, onlardan biridə Sumqayıt şəhərində yaşayan Çevik Polis Alayının çavuşu Ramil Şirinovdur.
Ailənin qayğıları ilə maraqlanan R.Hüseynov və Ş.Məmmədov şəhid ailələri və qazilərə dövlət səviyyəsində göstərilən diqqət və qayğıdan bəhs edib, Prezident İlham Əliyevin və Birinci vitse-prezident Mehriban xanım Əliyevanın hər zaman şəhid və qazilərimizin yanında olduqlarını bildirib.
Şəhidin ailə üzvləri onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya təşəkkürlərini ifadə ediblər.
Qeyd edək ki, Azərbaycan Respublikası Daxili İşlər Nazirliyinin Çevik Polis Alayının çavuşu olan Şirinov Ramil Arif oğlu Azərbaycan Respublikasının Silahlı Qüvvələri tərəfindən 19 sentyabr 2023-cü il tarixində həyata keçirilmiş uğurlu lokal antiterror tədbirləri zamanı Xocavənd rayonunda şəhid olub. Ölümündən sonra Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərdiyinə görə Ölkə Prezidenti tərəfindən "Vətən uğrunda” medalı ilə təltif olunmuşdur.
Xəbərdən istifadə edərkən istinad etmək vacibdir.
