Sumqayıtda 20 komandanın iştirakı ilə breyn-rinq yarışı keçirilib

«Azərikimya» İstehsalat Birliyində 28 may – Respublika günü münasibətilə tədbir keçirilib. Birlikdən Xeberle.com-a verilən məlumata görə, tədbirdə çıxış edənlər müsəlman Şərqində ilk demokratik respublika olan və xalqımızın keçdiyi tarixi yolun, müstəqillik uğrunda apardığı ardıcıl mübarizənin məntiqi nəticəsi kimi yaranan Azərbaycan Xalq Cümhuriyyətinin ölkəmizin çoxəsrlik sosial-iqtisadi, ictimai-siyasi və mədəni inkişafının, xalqımızın milli oyanışı və dirçəlişi proseslərinin təntənəsinin, birlik və bərabərliyinin bütün dünyaya nümayiş etdirməsinin təsdiqi olduğunu vurğulayıblar.
Qeyd olunub ki, 71 il sonra öz dövlət müstəqilliyini yenidən bərpa edən xalqımız yeni tarixi şəraitdə Ümummilli lider Heydər Əliyevin rəhbərliyi altında Azərbaycan Demokratik Respublikasının ənənələrini əsas tutaraq, müstəqil Azərbaycan dövlətini yaradıb və o dövrdən fərqli olaraq, mürəkkəb vəziyyətdə öz müstəqilliyini və suverenliyini qorumağı və möhkəmləndirməyi bacarıb.
Tədbirin növbəti mərhələsində «Azərikimya» İB-nin təşkilatçılığı və dəstəyi ilə 20-dən artıq komanda arasında "Breyn-rinq” – bilik yarışı keçirilib. Yarış iştirakçılarının xüsusi fəallığı, "Breyn-Rinq” yarışları üzrə mütəxəssislərin ciddi nəzarəti ilə üç mərhələdən ibarət olmaqla keçirilən bilik yarışmasında geniş dünyagörüşə malik olması və hazırcavablığı ilə seçilən Qafqaz Universitetinin komandası birinci, FHN-nin Sumqayıt Yanğından Mühafizə İdarəsinin və Azərbaycan Müəllimlər İnstitutunun Sumqayıt filialının komandaları müvafiq olaraq ikinci və üçüncü yerlərə sahib olublar.
Qalib komandalara «Azərikimya» İB tərəfindən diplom və qiymətli hədiyyələr təqdim olunub.
Həmçinin yarışda fərqlənən daha iki komanda - Qızıl Aypara Cəmiyyəti Sumqayıt şəhər bölməsinin və "Best Friends” komandaları fəxri-fərman və qiymətli hədiyyələrlə mükafatlandırılıb.
Xeberle.com