GƏNCLƏRİN DÜNYASI – DÜNYANIN GƏNCLƏRİ Sumqayıtda süni intellekt və gənclər mövzusunda möhtəşəm tədbir keçirildi Aprelin 5-də Sumqayıt Dünya Məktəbinin təşkilatçılığı ilə Sumqayıt Şəhər Heydər Əliyev Mərkəzində "Gənclərin Dünyası – Dünyanın Gəncləri” adlı genişmiqyaslı tədbir keçirildi. Tədbir, bu il Sumqayıt şəhərinin "Gənclər Paytaxtı” elan olunması münasibətilə təşkil olunmuş və şəhərin bu statusuna həsr edilmişdi. Tədbirin əsas mövzusu müasir dövrün və yaxın gələcəyin ən aktual texnoloji sahələrindən biri olan süni intellekt idi. Müzakirələrdə süni intellektin təkcə bugünkü imkanları deyil, həm də təhsil, elm və gündəlik həyatımızı necə dəyişdirəcəyi, gənclərin gələcəyinə necə istiqamət verəcəyi kimi vacib məsələlərə toxunuldu. Tədbir iştirakçıları əvvəlcə məktəbin şagirdləri tərəfindən hazırlanan yaradıcılıq sərgisi ilə tanış oldular. Sərgidə dulusçuluq, Ebru sənəti, rəsm üzrə master-klasslar keçirildi, həmçinin şagirdlərin "Günəş sistemi", "Sadə mexanizmlər", "Sağlam həyat" və "Həyat tsikli" mövzusunda layihələrə dair öz əlləri ilə hazırladığı əl işləri, planet, mexanizm maketləri, maraqlı rəsm əsərləri və mövzuya uyğun təqdimatlar nümayiş etdirildi. Qonaqlara eksponatlar barədə məlumatlar bilavasitə şagirdlər tərəfindən təqdim olundu. "Gənclərin Dünyası – Dünyanın Gəncləri” adlı tədbiri giriş sözü ilə Sumqayıt İcra Hakimiyyətinin birinci müavini Teymur Səmədov açdı. Tədbirin əsas hissəsində isə elmi və texnoloji panel müzakirə keçirildi. Panelə Elm və Ali Təhsil üzrə Dövlət Agentliyinin nümayəndəsi, dosent Elza Səmədova moderatorluq etdi. Panelin iştirakçıları sırasında: Buket Akkoyunlu – Çankaya Universiteti rektor müşaviri, professor Vüqar Cavadov – Boston Universiteti məzunu, "Neurotime” şirkətinin rəhbəri Günay Kazımzadə – Almaniyada süni intellekt üzrə "ilin gənc tədqiqatçısı”, "Google” və "Mercedes-Benz Consulting” layihələrində iştirakçı kimi sahənin peşəkar mütəxəssisləri yer aldı. Onlar süni intellektin gələcəkdə təhsil modellərini necə dəyişəcəyi, yeni ixtisasların yaranması, gənclərin bu sahədə karyera imkanları və etik tərəfləri kimi məsələlərə toxundular. Tədbirdə həmçinin Milli Məclisin deputatı, fəlsəfə doktoru Ceyhun Məmmədov, AMEA-nın müxbir üzvü, professor Misir Mərdanov və Xəzər Universitetinin qurucusu, professor Hamlet İsaxanlı iştirak etdilər və gənclərə dəyərli fikirlərini bildirdilər. Musiqi fasiləsində tanınmış muğam ifaçısı, beynəlxalq müsabiqələr laureatı Səbinə Ərəbli çıxışı ilə tədbirə xüsusi rəng qatdı. "Gənclərin Dünyası – Dünyanın Gəncləri” devizi altında keçirilən bu tədbir, gənclərin elmi maraqlarının, yaradıcılıq potensialının və texnologiyaya yanaşmasının inkişafı üçün mühüm platforma oldu. Bu cür təşəbbüslər, gəncləri yalnız izləyici deyil, aktiv iştirakçı və gələcəyə istiqamət verən liderlər kimi yetişdirməyi hədəfləyir.
Xəbərdən istifadə edərkən istinad etmək vacibdir.
