Yağışlı və küləkli hava şəraiti ilə əlaqədar Bakı-Sumqayıt qatarlarının hərəkətində problem yaranıb.
Xeberle.com-un məlumatına görə, sürət qatarında gecikmələr səbəbindən sərnişinlərin böyük sıxlığı müşahidə edilib.
Məsələylə bağlı Azərbaycan Dəmir Yolları (ADY) ilə əlaqə saxladıq. Qurumdan Xeberle.com-a bildirildi ki, güclü külək və leysan səbəbindən bəzi sahələrdə su yığılması, ağacın kontakt şəbəkənin üstünə aşması və elektrik enerjisinin kəsintisi kimi hallar qeydə alındığı üçün Abşeron dairəvi, Bakı–Ağstafa–Bakı və Bakı–Balakən–Bakı marşrutları üzrə qatarların hərəkətində gecikmələr müşahidə olunur: "ADY ölkə ərazisində qeyri-sabit hava şəraiti ilə əlaqədar olaraq, hərəkətin təhlükəsizliyinin təmin edilməsi, sərnişinlərin mənzil başına təhlükəsiz də çatdırılması məqsədilə gücləndirilmiş iş rejimində fəaliyyət göstərir”.
Qeyd olunub ki, Baş verən bütün hallara qarşı öncədən hazırlıqlar görülüb və operativ reaksiya verilir. Qurum hərəkət iştirakçılarına bu cür hava şəraitində dəmiryol keçidlərindən istifadə zamanı yüksək sayıqlıq göstərməyi və ehtiyatlı olmağı tövsiyə edir, sərnişinlərdən stansiya və platformalarda qatarları gözləyərkən diqqətli olmağı xahiş edir.
Xəbərdən istifadə edərkən istinad etmək vacibdir.
