Şikayətlər, keyfiyyətə dair qüsurlar və dərman vasitələrinin geri çağırılmasına dair tələblər dəyişib.
Xeberle.com məlumat verir ki, bununla bağlı Səhiyyə Nazirliyinin kollegiyası qərar qəbul edib.
Qərara əsasən, dərman vasitəsi və ya tədqiqat preparatlarının keyfiyyətinə dair hər hansı qüsur (istehsalat qüsurları, məhsulun xarab olması, saxtalaşdırma halları, dövlət qeydiyyat sənədləri və ya məhsulun spesifikasiyası ilə bağlı uyğunsuzluqlar və ya digər ciddi keyfiyyət qüsurları) təsdiqlənərsə, bu, dərman vasitəsinin geri çağırılmasına və ya təchizatının nəzərdə tutulmayan məhdudlaşdırılmasına səbəb ola bilər. Belə hallarda, bütün əlaqəli səlahiyyətli orqanlar dərhal məlumatlandırılmalıdır.
Dərman vasitəsinin geri çağırılması və ya keyfiyyət qüsurlarının araşdırılması ilə əlaqədar qərarların qəbul edilməsi, habelə bu problemlərin yaranmasına səbəb olan potensial risklərin idarə olunması üzrə səlahiyyət daşıyan şəxs müvafiq sahədə ixtisaslı və təcrübəli olmalıdır. Bu şəxslər satış və marketinq fəaliyyəti ilə əlaqəli olmamalıdırlar.
Keyfiyyət qüsuru ilə əlaqədar olmayan şikayətlər müvafiq qaydada sənədləşdirilməli və bu növ şikayətlərin araşdırılması və idarə edilməsi ilə səlahiyyətli quruma və ya şəxsə məlumat verilməlidir.
Əgər keyfiyyət qüsuru dərman vasitəsinin geri çağırılması və ya təchizatında nəzərdə tutulmayan məhdudiyyətlərə səbəb olarsa, istehsalçı dərman vasitəsinin dövlət qeydiyyatı haqqında vəsiqəsinin sahibini və digər müvafiq səlahiyyətli orqanları bu barədə dərhal xəbərdar etməlidir.
Xəbərdən istifadə edərkən istinad etmək vacibdir.
