Ramazan ayının başlanmasına az bir müddət qalıb. Bu ay həm də xüsusi tərbiyəvi əhəmiyyətə malikdir. Məsələn, digər vaxtlar spirtli içki qəbul edənlərin bir çoxu bu ayda oruc tutmasalar da, alkoqollu içkilərdən uzaq durmağa çalışırlar.
Digər aylardan fərqli olaraq, ancaq Ramazanın davam etdiyi müddətdə ticarət obyektlərində spirtli içkilərin satışı bir qədər zəifləyir. Bu, toy-nişan, yubiley və digər belə mərasimlərin keçirilməməsilə də bağlıdır. Orucluq ayı şadlıq evləri və restoranların da fəaliyyətinə təsir göstərir. Bakıdakı bir sıra restoran və şadlıq evlərində Ramazan ayı başa çatanadək toy mərasimləri keçirilmir. Bəzi istirahət və əyləncə mərkəzlərində isə ad günləri, yubileylər və digər əyləncə tədbirləri iftardan sonra düzənlənir. Amma onu da qeyd edək ki, bu cür hallarla yanaşı, iftardan əvvəl də toy-düyün mərasimləri təşkil olunan şadlıq evləri var. Belə məclislərin bəzilərində süfrəyə spirtli içkilər düzülür, bəzilərində isə ondan imtina edilir.
Ölkənin bəzi regionlarında Ramazan müddətində toy məclislərinin dayandırılması artıq bir ənənə halını alıb. Məsələn, Abşeron zonasını, cənub bölgəsini buna misal göstərmək olar. Ümumiyyətlə, Ramazanda toy etmək olarmı? Və ya nə dərəcədə düzgündür?
İlahiyyatçı Ceyhun Şükürov deyir ki, Ramazan ayının başlanması yeni ayın hilalının gözlə görünməsinə bağlı olduğundan bu iş, qabaqcadan elan olunan bir iş deyil. Həmçinin Ramazan ayının başlanması haqda qərarın verilməsində də alimlər arasında, təəssüf ki, uzun illərdir davam edən fikir ayrılığı mövcuddur: "Bəziləri bunun üçün hesablamanın kifayət etdiyini deyir. Bəziləri dünyanın istənilən nöqtəsində təzə ayın görünməsini kifayət bilir, bəziləri isə yalnız öz regionunda görünməsini şərt hesab edirlər. Yeni hilalın görünməsi gözlə və ya teleskop vasitəsi ilə mümkündür. Amma bəzi alimlər hesablama vasitəsi ilə də təzə ayın təxmini doğuşunu hesabladıqlarından bu il Ramazan ayının təxmini iyun ayının 18-nə təsadüf edildiyi bildirilir."
İlahiyyatçının sözlərinə görə, Ramazan ayı bir ibadət ayıdır və bu ayda səhər sübh tezdən axşam günbatana qəbər yemək-içmək və cinsi əlaqə kimi işlərə ara verilir: "İnsan özünü Allaha həvalə edərək, Onun rizası üçün mədəsini yemək-içməkdən, dilini də pis söz, qeybətdən, yalan və iftiradan qorumalıdır."
Toy mərasiminin keçirilməsinə gəldikdə isə C. Şükürov qeyd etdi ki, nəinki Ramazanda, hətta bütün aylarda toy etmək olar: "Toy məsələsinə gəldikdə isə toy bütün aylarda icazəlidir. İslam dini yalnız haram olan şeyləri qadağan edir Məsələn, toyda qadın-kişi bir yerdə olmasını, içki içməni və.s qadağan edir.Toy iki gəncin nikahına yaxınların və dostların şahidliyidir. Bu vaxt ziyafət verilir ki, bu ziyafət də Ramazanda yalnız iftardan sonra mümkün ola bilər."
O, qeyd etdi ki, İslam böyüklərinin ölüm tarixi və ya onların doğum tarixində toy etmək, nişanlanmaq məsələsinə gəldikdə İslam bunu qadağan etməyib: "Amma kimsə deyək ki, Hz İmam Hüseyni sevirsə və Məhərrəm ayının 10-cu günü, yəni Aşura günündə toy etmirsə, heç kəs ona bir söz deyə bilməz. Bu insanların həmin şəxsə olan sevgisindən irəli gəlir. Amma kimlərsə bunu ümumi İslam adına qadağan edə bilməz və ya əksinə, kimsə qalxıb da həmin gün toy etməlisən məcbur edə bilməz. İslam dini məcburiyyət dini deyil, sadəcə insanlar Allahın əmr və qadağalarını öz imanlarının gərəyi və Peyğəmbərinə itaət olaraq yerinə yetirirlər." (analitik.az)
Xəbərdən istifadə edərkən istinad etmək vacibdir.
