Azərbaycan Respublikasının Prezidenti İlham Əliyevin müvafiq sərəncamı ilə Sumqayıt şəhərində yaşayan tanınmış jurnalist Fadil Tahir oğlu Paşayev Əməkdar jurnalist fəxri adına layiq görülüb.


Xeberle.com-un məlumatına görə, Fadil Paşayev 1977-ci il fevralın 28-də Qubadlı rayonunun Dondarlı kəndində anadan olub. Orta təhsilini Sumqayıt şəhəri, Hacı Zeynalabdin qəsəbəsində yerləşən 19 nömrəli məktəbdə, daha sonra isə 22 nömrəli məktəbdə başa vurub.


O, 1994–1998-ci illərdə Azərbaycan Dövlət Pedaqoji Universitetinin filologiya fakültəsində bakalavr təhsili alıb, 1999–2001-ci illərdə isə həmin fakültənin magistratura pilləsini bitirib.


Peşəkar jurnalistika fəaliyyətinə 1996-cı ildə "168 saat" və "Azad Azərbaycan" qəzetlərində müxbir və şöbə müdiri kimi başlayan Fadil Paşayev, 2006-cı ildən Azərbaycan Televiziyası və Radio Verilişləri QSC-də (AzTV) müxtəlif vəzifələrdə çalışıb. O, 2008–2009-cu illərdə AzTV-nin Moskva bürosunun rəhbəri, 2009-cu ildən isə televiziya şirkətinin şimal bölgəsi üzrə müxbir məntəqəsinin redaktoru vəzifələrində fəaliyyət göstərib.


2014-cü ildə AzTV-nin Qazaxıstan və Orta Asiya ölkələri üzrə bürosunun rəhbəri təyin olunan Paşayev, bu dövrdə həm də Azərbaycanın Qazaxıstandakı səfirliyində mətbuat katibi kimi çalışaraq ölkəmizin mövqeyini regionda təbliğ edib.


2019-cu ildən AzTV-dəki fəaliyyətini başa vuran Fadil Paşayev KONKRET.az informasiya portalını təsis edib və hazırda bu xəbər saytının baş redaktoru kimi çalışır.
Ailəlidir, 3 övladı var.