İndi kimi dindirirsən, deyir, Avropa Oyunlarından sonra…

Məhləmizdə marketdən kənd qatığı almaq istəyirəm, deyirlər, yoxdur, Avropa Oyunlarından sonra. «Binə» yarmarkasında alt paltarı satan tanışa deyirəm, ora gəlim bir-iki şey alacam. Deyir, Avropa Oyunlarından sonra. Maşını ustaya aparmalıyam, xırda-para işlər var, usta da deyir, Avropa Oyunlarından sonra.
Bayaq bir dostum deyir ki, ə bə bilirsən başıma nə iş gəlib, hi? Deyirəm, nə iş? Deyir, ə bə, sevgilimə deyirəm gəl görüşək da bə. Qız deyir, Avropa Oyunlarından sonra da bə.
Uğunub getmişəm gülməkdən. Durdum 15 dənə «jim» vurdum, 3 dəfə dala, 4 dəfə qabağa salto aşdım, birtəhər özümə gəldim gülməkdən.
Məhləmizdə bir şit gədə var, çoxdandı ona bir söz demək istəyirdim, amma utanırdım, bu gün getdim pivə içdim, ürəkləndim və sözümü dedim. Dedim, ayə, sən nə vaxt adam olayssan ə? Dərhal cavab verdi ki, Avropa Oyunlarından sonra…
Əslində, bütün bu söhbətlər elə indi də ola bilər, məhlə uşağı adam ola bilər, alt paltarı almaq olar, maşını təmirə aparmaq olar, dostum da sevgilisi ilə görüşə bilər. Amma bəzi adamlar özünü elə aparır ki, guya Avropa Oyunlarını bütün yükü bunun çiyinlərindədir. Ona görə də, qaqam başını qaşımağa vaxt tapmır…
Əslində isə Avropa Oyunlarından sonra çox şey olacaq. Mən maaşımı alacam. Məzuniyyətə getməyə cəhd göstərəcəm. Sonra Polis Günü olacaq, 20 gün keçəndən sonra Jurnalistlərin peşə bayramı olacaq, sonra «inamarka» maşınlar texniki baxışdan keçmək üçün Maştağada növbəyə duracaq. Hansı ki, indi də gedə bilərlər, amma bizdə adətdir, axırıncı ayın, axırıncı həftəsinin, axırıncı iş günü gedirik…
Karoçi qavaryat, sonra Xaçmaz pomidoru yetişəcək, qarpız yeyib şişəcəyik, qarnımızı qabağa verib gəzəcəyik. Bir də görəcəyik, yekəqarın kişilər kəsiblər qapımızı. Bəs, nə var, nə var, parlamentə deputat seçkiləri yaxınlaşır. O deyəcək, maa səs ver, bu deyəcək, maa səs ver, biz də hamısına «baş üstə» deyib yola verəcəyik. Seçkilər də baş tutacaq. Hər kəs öz yerini tutacaq və həyat öz axarı ilə davam edəcək. Yolları qazıb su borusu çəkəcəyik, avtobus sürücülərinin əlindən cana-boğaza yığılacağıq, DYP cərimə yazanda isə özümüzü düzəltmək, qaydaları öyrənmək əvəzinə, variant axtaracağıq ki, necə edək cəriməni ödəməyək.
P.S. Hər şey bir yana, bu alt paltarı satan oğlanan Avropa Oyunları ilə nə əlaqəsi vardısa onu anlamadım…