Sumqayıt şəhərində küçə işıqlandırması ilə bağlı narazılıqlar artmaqdadır. Şəhərin müxtəlif ərazilərində, xüsusən yaşayış məhəllələrində gecə saatlarında işıq dirəklərinin işləməməsi və zəif işıqlandırma səbəbindən həm piyadalar, həm də sürücülər ciddi çətinliklərlə üzləşirlər.
Sakinlərin Xeberle.com-a bildirdiyinə görə, xüsusilə axşam və gecə saatlarında bəzi küçələrdə tam qaranlıq hökm sürür. Bu isə insanların hərəkətini təhlükəli vəziyyətə salır.
"Yağışlı və dumanlı havalarda qaranlıq yollar daha da təhlükəli olur. Xüsusilə uşaqlar və yaşlılar üçün bu ciddi problemdir,” – deyə şəhər sakinlərindən biri qeyd edib.
Məlumatlara əsasən, zəif işıqlandırılan ərazilərdə yol-nəqliyyat hadisələrinin sayı da artmaqdadır. Bu fakt vəziyyətin ciddiliyini bir daha ortaya qoyur.
Xüsusilə 76-cı məhəllənin Çerkası küçəsində işıq dirəklərinin uzun müddətdir işləmədiyi bildirilir. Sakinlərin çəkdiyi görüntülərdən də aydın olur ki, gecə saatlarında bu ərazidə göz-gözü görmür.
"Gecələr burada hərəkət etmək çətin olur. Bir sözlə, gediş-gəlişdə ciddi problem yaşanır,” – deyə yerli sakinlərdən biri bildirib.
Sakinlər aidiyyəti qurumlardan problemin operativ şəkildə həll olunmasını, nasaz işıq dirəklərinin təmir olunmasını və işıqlandırma sistemlərinin yenilənməsini tələb edirlər.
Şəhər sakinləri qeyd edirlər ki, yol işıqlandırması təkcə rahatlıq deyil, eyni zamanda təhlükəsizlik məsələsidir. Onlar ümid edirlər ki, Sumqayıt Şəhər İcra Hakimiyyəti və müvafiq kommunal qurumlar vəziyyətə dərhal müdaxilə edəcək və küçə işıqlandırma sisteminin bərpası üçün tədbirlər görüləcək.
Xəbərdən istifadə edərkən istinad etmək vacibdir.
