Artıq 2 aydan artıq bir müddətdir ki, təhsil qanunvericiliyinin tələblərini özündə ehtiva edən "Həmkara dəstək” kitabı çox faydalı vəsait kimi pedaqoqların ixtiyarına verilib. Kitabın müəllifləri 230 saylı tam orta məktəbin direktoru Elşən Qafarov və həmin məktəbin direktor müavini Ləman Babayevadır. 200 səhifəlik vəsaitdə 750 test sualı cavabları ilə birlikdə, kurikulum nəzəriyyəsinin sadələşmiş şəkildə izahı, tezarus və digər məsələlərlə bağlı materiallar öz əksini tapıb. Kitabın çap olunmasının əsasında müəllimlərin əksəriyyətinin kurikulumla bağlı biliklərinin eyni səviyyədə olmaması zərurəti durur. "Həmkara dəstək” metodik vəsaitinin bir üstünlüyü də sadə dildə yazılaraq müəllimlərin aydın başa düşəcəkləri bir formada hazırlanmasıdır.

Vəsait Təhsil Şurası İdarə Heyətinin və Şuranın Elmi-Metodiki Mərkəzinin qərarı ilə çap olunub. Onun hazırlanmasında pedaqoji elmlər doktoru, professor Əjdər Ağayevin, psixologiya elmləri doktoru Əbdül Əlizadənin, pedaqogika üzrə fəlsəfə doktoru Ənvər Abbasovun və digər müəlliflərin müxtəlif illərdə yazdıqları əsərlərdən, elmi-tədqiqat işlərinin nəticələrindən yaradıcılıqla istifadə olunmuşdur. Bu da öz növbəsində vəsaitin həm elmi, həm də praktik mahiyyətini artırır. Qeyd edək ki, kitabın rus dilində olan variantı da oxucuların istifadəsinə verilmişdir.