Klublarımızın növbəti Avropa sınağı başlayır. Avropa Liqasında I təsnifat mərhələsinin oyunları çərçivəsində bu gün daha 48 oyun keçiriləcək. Təmsilçilərimizdən "İnter" və "Qəbələ" səfərdə, "Neftçi" isə doğma meydanda ilk matçına çıxacaq. Çempionlar Liqasındakı təmsilçimiz "Qarabağ" klubu isə iyulun 15-də II təsnifat mərhələsində "Rudar"ı (Monteneqro) qəbul edəcək. Bir sözlə 4 komandamızın futbolçuları Avropanın yaşıl meydanlarında tər tökəcək.

Niyə mübarizə yox, mütaliə?

Əslində proqnoz vermək çətin olduğu qədər də asandır. Klublarımız ölkə çempionatında sərgilədiyi oyun tərzini bir çox hallarda avrokuboklarda təkrar və ya tədbiq edə bilmirlər. Topaz Premyer Liqasında şirə, pələngə dönən klublarımızın, qitənin müxtəlif ölkərinin təmsilçiləri ilə qarşılaşmalarda nə qədər dişsiz oynadığının dəfələrlə şahidi olmuşuq. Özü də futbol nəhəngləri yox, elə futbolu bizimlə eyni səviyyədə olan ölkələrin klubları ilə mübarizədə. Avroliqanın püşkatma mərhələlərində Azərbaycan klubları ilk olaraq futbolda söz sahibi olmayan komandalarla üz-üzə gəlir. Amma ilk mərhələdəcə elə bir zəif oyun nümayiş etdirirlər, sanki onlar üçün Avrokubok sadəcə plandan kənar bir turniridir və futbolçularımız mübarizəyə yox, mütaliyəyə başlayırlar. Yəni, rəqibi "oxumağa”.... Matçdan sonra deyirlər ki, rəqibi düzgün analiz edə bilmədik, nə bilim hava şəraiti uyğun deyildi, hətta bəlkə onu deyərlər ki, rəqib komanda bizə oyun taktikasını əvvəlcədən deməmişdi... 

Avropa oyunlarında ikinci olduq, futbolda niyə axırıncı olaq... 

Mən hansısa klubun adını çəkib, onun zəifliyi, futbolçularının məsuliyyətsiz olduğu barədə yazmaq belə istəmirəm. Çünki, burda qeyri-adi və nəsə yeni bir söz demək müşküldür. Bu sahəyə marağı olan və elə bu sahənin nümayəndələri yaxşı bilir vəziyyət necədir. Sözümün məğzi başqadır. "Bakı-2015” ilk Avropa Oyunlarının yekunlarına görə, qeyri-rəsmi komanda hesabında Azərbaycan ikinci yeri təmin etdi. Ardıcıl qazanılan yüksək əyarlı medallar azarkeşlərin və hətta idman yarışlarına marağı olmayan şəxslərin belə diqqətini cəlb etdi. Bunun nəticəsi idi ki, növündən asılı olmayaraq yarışların keçirildiyi bütün arenalarda möhtəşəm azarkeş dəstəyi müşahidə olundu. Bir sözlə, Azərbaycan azarkeşinin yarışlara marağının artdığı, arenalara ailəlikcə getmək kimi yeni bir azarkeş mədəniyyətinin formalaşdığı, yalnız qələbələrə alışdığımız bir vaxtda futbol klublarımızın üzərinə həmişəkindən çox məsuliyyət düşür. Futbolçularımız indi yaranmış bu vəziyyətdən öz xeyirlərinə istifadə edib, daha çox azarkeş dəstəyinə nail ola və həm də necə deyərlər canla-başla mübarizə aparıb bizi qələbələrlə sevindirə bilərlər. Mən deyərdim ki, indi futbolçularımız buna nəinki nail olmalıdır, hətta buna borcludurlar. Zəfər dolu günlərimiz davamlı olsun. Bunun üçünsə fiziki güclə bərabər, həm də iradə, vicdan lazımdır. Bir vətandaş olaraq Avroliqada ölkəmizi təmsil edən bütün klublarımıza səslənirəm, ən azı "Qarabağ” klubunun Avrokuboklarda sərgilədiyi mübarizliyi təkrar edin. Yəni uduzanda da bunu kişi kimi edin. Axı biz Avropada ikinci olduq ("Bakı-2015”). Futbolda niyə axırıncı olaq... 

Elnur Nifteliyev