Ölkəmizdə dərmanların vahid qiymətə satılması üçün iş aparılır. Bunun üçün ilkin siyahı da tərtib edilib. İlk siyahıya Azərbaycanda ən çox alınan və həyati əhəmiyyət daşıyan dərmanlar əlavə edilib. Belə dərmanların qiymətləri araşdırıldıqdan sonra yekun qərarla bütün apteklərdə vahid qiymətlə satışa çıxarılacaq. Səhiyyə Nazirliyi Tarif Şurası ilə birgə qeydiyyata alınan 4500-dən çox dərman növünün ən çox satılanlarını müəyyənləşdirib.   Yekun qərar qəbul edilmədiyindən ilkin siyahıda olan dərmanların adları hələlik açıqlanmır.   Dərmanların qiymətlərinin müəyyən edilməsi mərhələlərlə davam etdiriləcək. İyunun 9-dan etibarən Tarif Şurası dərman vasitələrinin istehsalçıları və ya onların nümayəndələrindən qiymət bəyannamələrini qəbul edir. Sənədlərə baxılarkən dərmanın orijinallığı və generikləri ilə bağlı Səhiyyə Nazirliyindən məlumat alınır. Qiymət bəyannamələri və tələb olunan sənədlər baxıldıqdan sonra dərman vasitələrinin qiymətlərinin tənzimlənməsi üçün Tarif Şurasının iclasının gündəliyinə daxil edilir.   Yekun qərarla dərmanaların vahid qiymətləri müəyyən ediləcək və yeni tariflərin qüvvəyə minəcəyi tarix açıqlanacaq. Hələlik bu qərarın veriləcəyi vaxt açıqlanmır. (xezerxeber.com)