İslamda olmayanı islamın adına tətbiq etmək doğru deyil.   Bu sözləri ilahiyyatçı Elşad Miri qəbir daşlarının üzərinə şeir yazılması ilə bağlı danışarkən deyib:   "İslamda bir insanın vəfatı ilə bağlı 4 vacib şərt var: yuyulma, kəfənlənmə, cənazə namazı və dəfn edilmə. Bundan başqa olanların islama aidiyyəti yoxdur. Peyğəmbərimizin dövründə də bir adam dəfn ediləndə adi bir baş daşı qoyurdular, üstünə ad, soyad yazmırdılar. Bu gün isə qəbir daşının üstünə şeir və ya başqa sözlər yazırlar. Bu da ona görədir ki, böyük bir daş düzəldilir, həmin daş boş qalmasın deyə, qarşı tərəfinə bir şəkil, arxa tərəfinə başqa şəkil vurulur, baş və sinə daşlarının boş qalan yerlərinə şeir yazılır və s. Bunun islama aidiyyəti, ölən adama isə bir faydası yoxdur. Əksinə, diri adama ziyanı var ki, o qədər vaxt gedir, pul israf olunur, ən əsası da qəbirüstü daşlarla bağlı bir peşənin ortaya çıxmasına səbəb olur. Ümumiyyətlə, islamda olmayan bir şeyi islamın adına tətbiq etmək doğru bir şey deyil”. (axar.az)