Azərbaycanın istirahət mərkəzlərində qiymətlərin baha olması barədə çox danışılıb. Yəqin elə bu səbəbdəndir ki, bəzi turistlər fərdi evlərdə dincəlməyi daha məqsədəuyğun hesab edirlər.
Azərbaycanın hər günəşi turizmin inkişafı üçün əlverişli olsa da, yayda ən çox üz tutulan məkanlardan biri və bəlkə də ən əsası Xaçmazın Nabran kəndidir. Bura ev turizmi baxımından da çox sərfəlidir. Bu kəndə hər yay istirahətə çox sayda insan gəlir. Nabranda məhz fərdi evlərdə dincələn yerli və xarici turistlər bildirirlər ki, onlara bu şəkildə istirahət daha ucuz başa gəlir.
Bakı sakini Sevil Ağayeva deyir ki, hansısa məkanda istirahətin bir gecəsi 200-250 manat olursa, fərdi evlərdə isə bu məbləğ 50 manat edir.
Rusiyanin Yekatrinburq şəhərindən gələn Elvira İsayevanın fikrincə, isə fərdi evlərdə dincəlmək insan üçün bir növ sərbəstlik yaradır. Eyni məbləğdə pulla xaricdə 10-12 gün qalmaq mümkündürsə, burada isə yarım ay dincəlmək olar.
Fərdi evlərdə yaradılan şərait də turistlərin ürəyincədir. Təmiz yataq dəsti, mətbəx, müasir istirahət otağı ilk baxışdan burada səmərəli istirahətdən xəbər verir. Evini kirayəyə verən Nabran kənd sakini Polad Abdullayev burada qiymətlərin bir gecə üçün 20 manatdan 50 manatadək dəyişdiyini deyir.
Xaçmaz Mədəniyyət və Turizim şöbəsinin müdiri Nazim Ağayev də yay mövsümündə fərdi evlərə turist axınının çox olduğunu qeyd edib. Onun sözlərinə görə, rayonun dənizkənarı Nabran, Yalama, Müqtədir, Seyidli ərazilərində xeyli sakin evlərini kirayəyə verir.
Ötən il rayonda fərdi evlərdə 1300 nəfər turist dincəlib. Bu il evlərin şəbəkəsi genişləndiyindən təxminən 2000 minə yaxın insanın kənd turizmindən yararlanacağı gözlənilir. (anspress.com)
Xəbərdən istifadə edərkən istinad etmək vacibdir.
