Dünən – iyulun 24-də hörmətli qələm dostumuz, jurnalistika sahəsində Osman Mirzəyev adına Respublika mükafatı laureatı Rəhman Orxanın (Məmmədzadə) Ad günü 65-ci dəfə qeyd olundu.

1950-ci ildə dünyaya gəlmiş bugünkü yubilyar həmkarımız orta məktəbi 1967-ci ildə Şəki rayonunun Qayabaşı kəndində başa vurduqdan sonra Azərbaycan Neft və Kimya İnstitutunu (indiki Neft Akademiyasını) mühəndis-mexanik ixtisası üzrə bitirərək, 4 il Sumqayıt Polimer Materialları İnstitutunda, 10 il isə Azərbaycan Boru-prokat zavodunda, həmin müəssisənin çoxtirajlı "Metallurq” qəzetində çalışıb. Özünün dediyinə görə, zavodda konstruktor bürosunun rəisi işləyərkən "əli dinc durmamış” və rusca nəşr olunan "Vışka” qəzetinə məqalələr yazmağa başlamışdı. Onun müxtəlif məvzularda yazıları o zaman həmin qəzetin nüfuzlu rəhbərlərinin - respublikanın Əməkdar jurnalistləri Osman Mirzəyevin və Gennadi Qluşkovun diqqətini cəlb edir və bir qədər sonra Rəhman Orxan onların təklifini və dəvəti üzrə "Vışka” qəzetində sənaye şöbəsinin müxbiri kimi işə başlayır. O, sonralar qəzetin Sumqayıt-Quba, 1987-ci ildən isə Naxçıvan Muxtar Respublikası və Dağlıq Qarabağ üzrə xüsusi müxbiri kimi fəaliyyət göstərir.

Rəhman Orxan 1992-ci ildən MDB və Avropa ölkələrində (o cümlədən – Bolqarıstan, İsrail, Kanada, Monqolustan və qismən ABŞ-da) yayılan "Bakinets” qəzetinin təsisçisi və baş redaktoru kimi respublikada daha geniş tanınıb. 1993-cü ildə jurnalistika sahəsində özünün ustadı hesab etdiyi Osman Mirzəyevin adına təsis edilmiş Respublika mükafatının ilk dörd laureatından biri olur (əslində Beynəlxalq mükafat kimi təsis edilmiş həmin mükafat ilk olaraq Amerika jurnalisti Tomas Qoltsa, Latviyalı müxbir, indi Azərbaycanın Əməkdar jurnalisti Tatyana Çaladzeyə, "Bakinski raboçi” qəzetinin redaktor müavini İbrahim Şükürova və R.Orxana verilir).

Sonralar - 2001-ci ildən R.Orxan "Azərikimya” İB-nin Mətbuat xidmətinin rəhbəri vəzifəsində çalışıb. 2013-cü ildən Sumqayıt Bələdiyyəsinin Mətbuat katibidir. Bu gün də böyük yaradıcılıq həvəsi ilə yazıb-yaradan, xüsusilə də bizim xəbər portalının daimi müəllifi kimi yazıları ilə bizi gecə-gündüz "narahat edən”, yeri düşəndə iradlarını bildirən və tövsiyələrini verən təcrübəli qələm dostumuzu 65 illik yubileyi münasibətilə ürəkdən təbrik edir, ona yeni yaradıcılıq uğurları və sağlam, uzun ömür arzu edirik!

Özünüz də, qələminiz də yazıb-yaratmaqdan yorulmayasınız, Rəhman müəllim!

Xeberle.com