İyulun 30-da Qubadlı Rayon İcra Hakimiyyətinin iclas zalında 2015-ci ilin birinci yarısının sosial-iqtisadi inkişafının yekunları və qarşıda duran vəzifələr müzakirə olunub.
Rayon icra hakimiyyətinin başçısı Malik İsaqov çıxış edərək ötən altı ayda Qubadlı rayonu üzrə görülən işlərdən danışıb, birinci Avropa Oyunlarına yüksək səviyyədə ev sahibliyi edən ölkəmizin uğurları barədə məlumat verib.
Hesabat yığıncağında məruzə ilə çıxış edən rayon icra hakimiyyəti başçısının müavini Sahib Əliyev qeyd edib ki, son altı ayda rayonda 54 yeni iş yeri açılıb. Ümumilikdə yeni yaradılan iş yerlərinin sayı 3 min 210-a çatdırılıb.
Qeyd olunub ki, birinci yarım ildə Beyləqan rayonunda məskunlaşan 1 ailə, Saatlı rayonunda isə 5 ailə yeni mənzilə köçüb. Qışa hazırlıq məqsədilə dam örtüklərinin təmir olunması icra hakimiyyətinin əsas diqqət göstərdiyi sahələrdən olduğundan bu iş hesabat dövründə də davam etdirilib.
Hesabat dövründə əhalinin aztəminatlı hissəsi də diqqətdən kənarda qalmayıb. Daxili imkanlar hesabına 2015-ci ilin birinci yarısında yas mərasimlərinin təşkilinə, xəstələrin müalicəsinə və sair məsələlərlə bağlı aztəminatlı ailələrə 36 min 800 manat maddi yardım edilib, bayram münasibətilə 600 aztəminatlı ailəyə 12 min manat dəyərində ərzaq bağlaması paylanılıb.
Cari ilin ötən dövründə Qubadlı Rayon Əhalinin Sosial Müdafiəsi Mərkəzi tərəfindən 186 ailənin hər bir üzvünə 34,36 manat, hər bir ailəyə isə 136,11 manat məbləğində yardım təyin olunub. Əhalinin Sosial Müdafiəsi Mərkəzinin Sosial Məişət Xidməti Sektorunda 360 nəfər tənha-ahıl və əlil qocaya sosial xidmət göstərilir.
Sonra təhsil, səhiyyə, mədəniyyət və idman sahəsində görülən işlər təhlil edilib.
Hesabat məruzəsi ətrafında çıxış edən rayon maliyyə şöbəsinin müdiri Kəmaləddin Rüstəmov, Əhalinin Sosial Müdafiəsi Mərkəzinin direktoru Fazil Nərimanov, vergilər idarəsinin rəisi Əhliman Qasımov və Yuxarı Mollu kənd inzibati ərazi dairəsi üzrə nümayəndəsi Rafiq İsmayılov görülən işlərdən bəhs edərək bildiriblər ki, ölkəmiz hərtərəfli inkişaf yolundadır. İndi hər bir vətəndaş yaxşı başa düşür ki, inkişafın qarantı ölkədə yaradılmış ictimai-siyasi sabitlikdən və hər bir kəsin üzərinə düşən vəzifələri layiqincə yerinə yetirməsindən çox asılıdır. Əminliklə vurğulanıb ki, həmişə dövlətçilik ənənələrinə sədaqəti ilə seçilən rayon sakinləri Prezident İlham Əliyevin qarşıya qoyduğu vəzifələrin uğurla yerinə yetirilməsi üçün bundan sonra da var qüvvələri ilə çalışacaqlar.
Sonda Prezident İlham Əliyevin Sərəncamı ilə təltif olunan Yuxarı Mollu kənd inzibati ərazi dairəsi üzrə nümayəndə Rafiq Hüseyn oğlu İsmayılova "Tərəqqi” medalı təqdim edilib. (azertag.az)
Xəbərdən istifadə edərkən istinad etmək vacibdir.
