Fövqəladə Hallar Nazirliyinin Sumqayıt Regional Mərkəzi Sumqayıtın Tarix Muzeyinin akt zalında "Fövqəladə hallar zamanı davranış və yanğın təhlükəsizliyi qaydaları” mövzusunda maarifləndirmə xarakterli seminar keçirib. Tədbir şəhər bələdiyyəsinin məhəllə komitələrinin nümayəndələri üçün təşkil edilib.
Sumqayıt Regional Dövlət Yanğın Nəzarəti İdarəsinin rəis müavini, polkovnik-leytenant Məmməd Bağırov, regional mərkəzin inspektoru kapitan Qorxmaz Həsənov, FHN-in Dövlət Sularda Xilasetmə Xidmətinin bölmə müdiri Mansur Piriyev və digərləri çıxış edərək seminarın məqsədi barədə məlumat veriblər. Qeyd olunub ki, tutduğu vəzifədən və yaşından asılı olmayaraq, əhalinin bütün təbəqələrinin fövqəladə hallar baş verdikdə, xüsusilə yanğın təhlükələrinin qarşısının alınması sahəsində müəyyən məlumat, bilik və vərdişlərə malik olmaları mühüm əhəmiyyət kəsb edir.
Çıxış edənlər son dövrlərdə respublika ərazisində yanğın hallarının çoxaldığına diqqəti cəlb etməklə müəssisələrdə, ictimai və yaşayış binalarında baş verən müxtəlif xarakterli yanğınların ilkin törənmə səbəbləri, onların profilaktikası və qarşısının alınması üsulları, məişətdə qaz və elektrik cihazlarından təhlükəsiz istifadə qaydaları haqqında söhbət açıb, yanğın təhlükəsizliyi qaydalarına riayət olunmasının, belə bir mühüm məsələdə qəti olaraq laqeydliyə, səhlənkarlığa yol verməməyin vacibliyindən danışıblar.
Seminarda yay günlərində Xəzər dənizinin və çayların çimərlik sahələrində mövcud olan problemlərdən də bəhs edilib, Sumqayıtın sahil boyu ərazilərində aparılan monitorinqlər zamanı xoşagəlməz hadisələrin qeydə alındığı diqqətə çatdırılıb.
Sonda tədbir iştirakçılarını maraqlandıran çoxsaylı suallara aydınlıq gətirilib, Fövqəladə Hallar Nazirliyinin respublikanın regionlarında fəaliyyətinə dair videosüjet nümayiş etdirilib. (azertag.az)
Xəbərdən istifadə edərkən istinad etmək vacibdir.
