İyulun 30-da Samur-Abşeron kanalının Sumqayıt şəhəri ərazisindən keçən hissəsində (ən yaxınlıqdakı xilasetmə məntəqəsindən 30 km aralıdakı nəzarətsiz ərazidə) çimərkən batmış 1995-ci il təvəllüdlü Vüqar Rövşən oğlu Paşayevin axtarışları başa çatıb.


Xeberle.com-un Fövqəladə Hallar Nazirliyinin (FHN) saytına istinadən verdiyi məlumata görə, V. Paşayevin meyiti nazirliyin Dövlət Sularda Xilasetmə Xidməti və Xüsusi Riskli Xilasetmə Xidmətinin dalğıc xilasediciləri tərəfindən batdığı yerdən, təxminən, 2 km aralıda tapılaraq sudan çıxarılıb və aidiyyəti üzrə təhvil verilib.

Xatırladaq ki, 21 yaşlı gənc nişanlı idi və oktyabrda toyu olacaqdı.

V.Paşayevin ailəsi mətbuata açıqlama verərək Samur-Abşeron su kanalında bataraq itkin düşən oğullarının cəsədinin neçə gündür ki, tapılmamasından şikayət ediblər. Vüqarın atası Paşayev Rövşən isə aidiyyatı qurumları bu məsələdə məsuliyyətli bilərək içməli su kanalının nədən çəpərlənmədiyini, kanalın kənarında heç bir işarə, məlumat, qadağanın olmadığını bildirmiş və oğlunun səhlənkarlığın qurbanı olduğunu qeyd etmişdi.