"Azərikimya” İstehsalat Birliyinin akt zalında idarə və müəssisə rəhbərlərinin, baş mühəndislərin, istehsalat və sex rəislərinin, əməyin mühafizəsi və təhlükəsizlik texnikası üzrə mütəxəs­sislərin, bu sahəyə cavabdehlik daşıyan digər məsul şəxslərin və gənc kimyaçıların, həmçinin müxtəlif işçi geyimləri və FMV-lərin istehsalı ilə məşğul olan "Alyans Tekstil” tikiş fabrikinin nümayəndəsinin iştirakı ilə işçilərin sağlamlığının qorunması, istehsalat sahələrində kimyaçı əmə­yinin mühafizəsi məqsədi daşıyan fərdi mühafizə vasitələrinin yeni təklif olunan variantlarının müzakirəsinə həsr olunmuş geniş yığıncaq keçirilmişdir.

Tədbiri giriş sözü ilə açan "Azərikimya” İB-nin İçraçı direktorunun Əməyin mühafizəsi və ətraf mühitin qorunması üzrə müavini Vüqar Kərimov istehsalat sahələrində fərdi mühafizə vasitələrinin mühüm əhəmiyyətindən danışmış və slaydlar vasitəsilə FMV-lərin fəsillərə uyğun yeni təklif olunan variantlarını təqdim etmişdir.

Əsasən qaynaqçı, elektrik, laborant, tikinti işlərində çalışan işçilər, mühəndis texniki işçilər, fəhlələr və çilingərlər üçün nəzərdə tutulmuş xüsusi geyimlərin və ayaqqabıların, əlləri, tənəffüs, görmə, eşitmə orqanlarını və başı mühafizə edən, həmçinin hündürlükdən yixilmaqdan qoruyan vasitələrin yeni variantlarının təqdimatı geniş müzakirəyə səbəb olmuş, müzakirəətrafı çıxışlarda kimyaçıların istək, arzu və təklifləri nəzərə alınmaq üçün qeydiyyata götürülmüşdür.