Hansı məmur yarımçıq tikilini 3 milyon manata alaraq otel tikdirir?

Məlum olduğu kimi, turizm sahəsi infrastruktura bağlıdır. Əgər təbii imkanları, resursları infrastruktur da dəstəkləyirsə, həmin ölkə turizmin inkişafından böyük həcmdə xeyir götürməyə başlayır.

Bu mənada ölkəmizin resursları kifayət qədər olsa da infrastrukturu və turistik məkanlarda xidmət səviyyəsi, eləcə də qiymətlər arzuolunan deyil. Ola bilsin ki, Bakı otel brendlərinin burada yerləşməsi ilə son bir neçə ildə xeyli irəli gedə bilib. Ancaq təbii resursların çox olduğu regionlarımız barədə eyni sözləri deyə bilmərik. Əksər regionlarda normal, tutaq ki, avropalı turisti qane edəcək infrastruktur - otel, əyləncə mərkəzləri, eləcə də xidmət səviyyəsi yoxdur.

Şəhərimizdə - Sumqayıtda da otellər barədə danışa bilmirik, çünki onların sayı çox deyil. Şəhərin təbii resurslarından – Xəzərsahili çimərlikdən və Coratın tarixiliyindən isə istifadə edə bilmirik.

Şəhərin ən yüksək standartlara cavab verən oteli “Term” otelidir. 25 otağı ilə yanaşı otelin böyük idman kompleksi, SPA mərkəzi, restoranı, fitnez zalı, futbol meydançası, konfrans zalı var. Qiymətlərə gəlincə isə oteldə bir nəfər üçün bir gecəlik qiymət 70 manatdan başlayır.

Ümumilikdə oteldəki 25 otaqdan  2-si lüks, 23-ü standartdır. Bir nəfərlik standart otağın qiyməti 70, iki nəfərlik isə 90 manatdır. Lüks otaqlar üçün isə 140 manat xərcə düşmək lazımdır. Qiymətlərə səhər yeməyi daxildir.

Xarici turistin internet üzərindən şəhərimizdə sifariş edə biləcəyi yeganə otel də elə “Term”dir. Otel 4 ulduzludur.

Sumqayıtın köhnə mehmanxanası “Dalğa”da hazırda yerli və xarici qonaqların ixtiyarındadır. Ancaq bu mehmanxananın istirahətə gələn turisti qane edəcəyinə inanmaq olmaz. Burada yüksək modern standartların olmaması bir yana, əlavə komplekslərin olmaması da istirahət imkanlarını məhdudlaşdırır. Mehmanxanadan “168 saat”a verilən məlumata görə burada ümumilikdə 53 otaq var. Bütün otaqlar 2 nəfərlikdir, 6 otaq lüks otaqdır. Qiymətlərə gəlincə isə 2 nəfərlik sadə otağın qiyməti 40, lüks otağın qiyməti isə 60 manatdır.

“Aylı gecə” moteli isə 3 ulduzludur. Ancaq bu motelin də xarici turistin diqqətini cəlb edəcəyinə inanmaq sadəlövhlük olardı.

Ancaq ilin sonuna kimi Sumqayıt daha bir otelə sahib olacaq.Həm də bu otelin öz standartlarına görə rəqiblərini bir neçə dəfə qabaqlayacağı gözlənilir. Hazırda şəhərin “Sülh” küçəsində, 12 mərtəbəli binalarla üzbəüz yerləşən tikintisi davam edən hündürmərtəbəli tikili məhz həmin oteldir.

Otelin 5 ulduzlu olacağı gözlənilir. Bina “ABN-Az” şirkəti tərəfindən tikilir.

Layihə barədə məlumat almaq üçün tikinti gedən əraziyə getdik. İşə nəzarət edənlərdən biri olduğunu deyən şəxs bildirdi ki, rəhbərlik yoxdur, buna görə də heç kim bizə heç bir məlumat verə bilməyəcək. Mühafizəçilərin “ratsiya” ilə gəlişimiz barədə məlumat verdiyi adamın isə reaksiyası belə oldu: “Deməmişəm, içəri heç kimi buraxmayın?! Rəhbərlik yoxdur!”

“ABN –Az” şirkətinin  internet saytına layihə barədə göndərdiyimiz sorğuya isə 6 gün ərzində təəssüf ki, hələ cavab gəlməyib. Şirkətin baş ofisindən isə telefona cavab verən olmadı. Şirkət barədə saytındakı məlumatlardan isə məlum olur ki, “ABN-Az”-ın adındakı “AZ”a baxmayaraq o, yerli yox, Türkiyə şirkətidir. Əsasən tikinti işləri ilə məşğul olan şirkətin bu vaxta qədər Azərbaycandakı layihələri barədə internet resursda hər hansı bir məlumat yoxdur.

Nəhayət, yeni otel barədə olduqca ilginc bir məlumat: Redaksiyamıza etibarlı mənbələrdən verilən bilgiyə görə bu otel yüksək çinli bir məmura aiddir: “Burada tikinti məlum olduğu kimi uzun müddət idi ki, gedirdi. Ancaq həmin bina həmin vaxt “Texnikabank”a aid idi. Lakin sonradan bankın rəhbərliyinin həbsi layihəni yarımçıq qoydu. Bank bu yaxınlarda bu yeri və yarımçıq binanı satdı. Qeyri-səhih məlumata görə həmin yer və bina üçün ümumilikdə 3 milyon manata yaxın vəsait ödənilib”.

Bu otellə bağlı ən maraqlı məlumat isə budur ki, şəhərin bir çox müəssisələrinə, xüsusilə daxili və xarici qonaqları qəbul edən idarə və təşkilatların bir neçəsinə növbəti ildən öz qonaqlarını həmin oteldə yerləşdirməyi tövsiyə ediblər. Bu tövsiyənin adı isə yazının başlığındadır.(168saat.com)