"Övladımızın orta məktəbə hicablı gəlməsinə direktorlar icazə vermir”

Bu sözləri Sumqayıt sakinləri müraciətlərində bildiriblər. Şikayətçi Hicran Aslanova deyir ki, övladları Türkan Aslanlı və Fatimə hicablı olduğu üçün oxuduqları 37 saylı orta məktəbə rəhbərlik tərəfindən buraxılmır. Digər şikayətçilər Şahverənov Raqib və adını qeyd etmək istəməyən valideyn də Hacı Zeynəlabdin Tağıyev qəsəbəsində yerləşən 19 saylı orta məktəbdə eyni problemin yaşandığını bildiriblər. Valideynlərin sözlərinə görə, məktəb rəhbərlərindən hicab qadağasının səbəbini soruşduqda "bizə belə əmr edilib”,- deyə cavab verilib.

AzadXeber.az olaraq, problemə aydınlıq gətirmək üçün Sumqayıt şəhərinə üz tutduq. İlk getdiyimiz ünvan 37 saylı məktəb oldu. Müəssisə işçiləri direktor Elşad Eyvazovun məzuniyyətdə olduğunu bildirdilər. İşçilərdən adıçəkilən müəssisədə hicab probleminin olub-olmadığını soruşduqda isə onlar şikayətçinin sözlərini təsdiqlədilər. Onlar bildirdilər ki, Elşad Eyvazov hicablı şagirdlərin dərsə gəlməsinin əleyhinədir. Səbəb kimi isə, bunun daxili nizamnamələrinə zidd olduğunu göstərdilər. Rəhbəliyin olmamasından bizə həmin nizamnaməyə baxmaq nəsib olmadı. Etiraf edək ki, bizə də maraqlı qaldı axı hansı nizamnamədən söhbət gedə bilər ki, hicab haqqında konstitusiyamızda elə bir qadağa edilməsi barədə bənd yoxdur. Eyni zamanda hər bir vətəndaş bilməlidir ki, nizamnamədə göstərilən bəndlər konstitusiyaya zidd olmamalıdır.

Məsələnin ciddiliyini nəzərə alıb edilən bütün şikayətlər üçün birbaşa Sumqayıt Şəhər Təhsil Şöbəsinə yollandıq. İdarədə bizi qarşılayan isə şöbənin müdir əvəzi Əliəkbərov Vaqif oldu. Vaqif bəy bizi valideynlərlə birgə qəbul edərək bütün şikayətləri dinlədi. İlk öncə uşaqların dərs saatlarında hicabların açmasını təklif etdi. Valideynlər isə buna öz iradlarını bildirdi. Daha sonra söhbət zamanı Vaqif bəy də Allaha inandığını və inanclı şəxslərə qarşı özü də daxil olmaqla hər kəsin hörmət etməsinin vacib olduğunu dedi. Ardınca o, şikayətçilərin iradlarını dəyənləndirərək elə yanımızdaykən otağındakı xidməti telefondan 19 saylı məktəbin direktoru Rəfael Zeynalova zəng etdi. Lazımı tapşırıqlarını verib bundan sonra şagirdlərin məktəbin vahid formasından imtina etməmək şərtiylə hicablı şəkildə gəlmələrinə şərait yaratması göstərişini verdi. Digər 37 saylı məktəbdəki problemin də eyni üsul ilə həll olunacağını bildirən Vaqif bəy, bir daha sözügedən mövzuda heç bir problemin yaranmamaması üçün əlindən gələni edəcəyini dedi.(azadxeber.az)