Sumqayıta yeni təyin edilən icra başçısı Zakir Fərəcov bu gün icra hakimiyyəti binasında şəhərin bütün idarə və müəssisə rəhbərlərin iştirakı ilə geniş müşavirə keçirib. Zakir Fərəcov bildirib ki, müşavirənin keçirilməsində əsas məqsəd Sumqayıtda bütün sahələr üzrə müzakirələr aparmaq, idarə rəhbərlərinin gördüyü işlərə bir aydınlıq gətirməkdir. Müşavirə zamanı Zakir Fərəcov şəhərin hazırkı görkəmin bərbad olduğu, son illər ərzində Sumqayıtda ciddi irəliləyişlərin olmamasını, şəhərin ölkənin ümumi inkişaf tempindən kənarda qalmasını, hətta ən geridə qalmış bölgələrdən biri olmasını qeyd edib. O, bununla yanaşı, şəhərin təhsil və səhiyyəsinin də əvvəlki vaxtlarla müqayisədə xeyli gerilədiyini söyləyib: "Mən Sumqayıtda yaşamışam və bundan sonra da Sumqayıtda yaşayacam. Deyə bilmərəm ki, mən bu vəzifədə nə qədər müddət qalacam, amma həmin müddətdə mən Sumqayıta tam mənada xidmət edəcəm. Bu şəhər mənim üçün çox doğma və əzizdir. Çox təəssüf ki, Sumqayıt kimi böyük potensialı olan şəhər hazırda bu duruma düşüb. Axı sumqayıtlılar buna layiq deyillər. Sumqayıt sakinlərinin əksəriyyəti zəhmətkeş insanlardır, burada zavod və fabriklərdə, məktəblərdə çalışan qədirbilən insanlar yaşayıblar və yaşayırlar."