Xəbər verildiyi kimi sentyabrın 17-də Bakı - Sumqayıt yolunda mikroavtobus qəzaya uğradı. Baş verən yol-nəqliyyat hadisəsi nəticəsində 3 nəfər həyatını itirdi, 9 nəfər isə ağır yaralandı.
Qəzaya uğrayan "Ford Transit”markalı mikroavtobusun sürücüsü Baloğlan Ağakişiyev haqqında redaksiyamıza ilginc məlumat daxil olub. Zəngilan rayonundan qaçqın düşən Baloğlan Ağakişiyev təxminən 8 il bundan öncə Sumqayıt şəhərində 9 saylı yataqxanada yaşayırmış. Özünün şəxsi maşını ilə meyvə-tərəvəz ticarətilə məşğul olurmuş. Bir gün B.Ağakişiyev həmin yataqxanada yaşayan qonşusu 15 yaşlı İlkindən xahiş edir ki, onunla birlikdə meyvə satmağa gedib ona yardım etsin. Elə həmin gün yataqxananın həyətində B.Ağakişiyev maşını idarə edərkən aşırır.
Baş verən bədbəxt hadisə nəticəsində gənc İlkin həyatını itirir. Ən dəhşətlisi də odur ki, İlkin ailənin yeganə və əziz övladı olduğu onun itkisi ailə üzvlərini, doğmalarını bərk sarsıdır. Dəfn günü dayısının qəlbi bu ağrıya dözməyərək dayanır. Bir ilin içərisində İlkinin nənəsi və anası da dünyasını dəyişir. Baloğlan Ağakişiyev heç bir məsuliyyətə cəlb olunmur. Çünki baş verən hadisəni qəza hesab edən ailə üzvləri ondan şikayət etmirlər. Ailənin başı öz dərdinə qarışır.
Üzərindən neçə il ötdükdən sonra B.Ağakişiyev ikinci bir faciəyə imza atır. Bu dəfə isə miqyası daha böyük. Görünür Baloğlan məsuliyyətə cəlb olunmasa da, hələ də üzərində bir lənət daşıyırmış. Son məlumata görə sürücü Baloğlanın da vəziyyəti ağırdır. Onun komada olduğu bildirilir. Buna baxmayaraq yaralı sürücü polis nəzarəti altındadır və sağalan kimi məhkəməyə çıxarılacaq. Ehtimal olunur ki, barəsində həbs-qətimkan tədbiri seçiləcək.
Aytən Əliyeva, Xeberle.com