Bildiyiniz kimi, sentyabrın 15-dən başlayaraq dərman vasitələri yeni qiymətlərlə satışa çıxarılıb. İlkin mərhələdə 1057 adda dərmanın qiyməti tənzimlənib. İlin sonunadək isə dövlət qeydiyyatında olan bütün dərman vasitələrinin qiymətlərinin tənzimlənməsinin başa çatdırılmsı gözlənilir.
Artıq paytaxt Bakıda sakinlər apteklərdən adları siyahıda olan dərmanları yeni qiymətə yəni, ucuz əldə edə bilirlər. Bəs görəsən Sumqayıt şəhərində vəziyyət necədir?
Xeberle.com-un əməkdaşı Sumqayıtda bir neçə aptekə baş çəkərək, dərmanların qiyməti ilə maraqlanıb. Qiymətlərin ucuzlaşma xəbərini xoş qarşılayan alıcılardan biri ilə söhbət etdik. Bildirdi ki, ötən həftə həkim oğluna dərman yazıb: "Resepti neçə aptekə göstərdim və hamısında 36 manat ödəməli olduğumu dedilər. Ala bilmədim, çıxdım getdim. İndi eşitdim ki, qiymətlər ucuzlaşıb. Gəldim, görüm nə qədər ucuzlaşıb?"
Xanımdan dərmanın adlarını götürüb bizdə apteklərdə qiymətlərlə maraqlandıq. Amma onunla birlikdə bizdə məyus olduq. Ucuzlaşan dərmanlar siyahısında sən demə daha çox uşaqların əziyyət çəkdiyi qurd xəstəliklərinin müalicəsində istifadə edilən dərman preparatları yoxdur. İlk baş çəkdiyimiz "Zəfəran " aptekin əməkdaşı bildirdi ki, endirim qurd dərmanlarına aid edilməyib: "Hansı ölkədə istehsal edilməsindən asılı olmayaraq , endirim dərmanların təkibinə görə edilib."
"İntermed” diaqnostik mərkəzinin aptekində isə ucuzlaşan dərmanların hələlik hamısının aptekdə olmadığı söylənildi. Əsasən qan təzyiqi, antibiotik, oynaq və s. xəstəliklər üçün nəzərdə tutulan dərmanların ucuzlaşdığı qeyd edildi. "Zəfəran” aptekin digər şəbəkəsi olan "Kanon”da yeni ucuzlaşan qiymətlərin xeyirindən faydalanıb şəfalanmaq istədik. Boğaz aqrısı və soyuqdəymə üçün nəzərdə tutulan "Fibron” siropun əvvəlki qiymətinin 5 manat olduğunu öyrəndik. Hazırda isə 3 manat 86 qəpiyə satılan "Fibron”siropu ilə birlikdə uc paket qrip tozuna 5 manat 22 qəpik ödədik. Bir sözlə qiymətlərdə heç bir ucuzlaşma hiss etmədik. Baş çəkdiyimiz digər apteklərdə də eyni vəziyyətin şahidi olduq. Aptekdə olan alıcılar bildirdilər ki, onlara lazım olan dərmanların qiyməti dəyişməyib.
Hətta ,ucuzlaşan dərmnların qiyməti arasındakı fərqin o qədər də böyük olmadığını deyənlər də tapıldı. Tarif şurası isə əhalinin nəzərinə çatdırıb ki , ilin sonuna kimi tərkibinə görə ucuzlaşan dərmanlardan savayı , digər dərmanların da qiymətlərinin tənzimlənməsi nəzərdə tutulub.
Yeri gəlmişkən onu da qeyd edək ki,  səhiyyə nazirinin müavini Elsevər Ağayev  jurnalistlərə açıqlamasında bildirib ki, dərman preparatlarının yeni qiymətlə satışa çıxarılması işi hələ təzə başlayıb və buna görə də problemlərdən qaçmaq mümkün deyil: "Hələlik dərman preparatlarının yeni qiymətlə satışında müəyyən qədər problemlər var. Çünki satışda həm qiyməti düzgün göstərilməyən, həm də qeydiyyatdan keçməyən preparatlar var. Ona görə də mövcud problemlərin həlli zamanın işidir. Hesab edirəm ki, qısa zaman kəsiyində problemlər aradan qaldırılacaq”.
Aytən Əliyeva
Xeberle.com