Bildiyiniz kimi, 1 noyabr Parlament seçkiləridir. Artıq yüzlərlə şəxslər öz namizədliyini irəli sürüb. Əlbəttə ki, bu şəxslərin içərisində layiq olan və olmayan namizədləri görürük. Layiq olmayanlar da dəridən-qabıqdan çıxaraq çalışırlar ki, özlərini ən yaxşı namizəd kimi tanıtsınlar.

Bəs, ən yaxşı namizəd kimdir ?

Mənim üçün ən yaxşı namizəd, elmli, savadlı, dünyagörüşlü, tək seçki vaxtı insanların yanında olub sonra itən yox, seçicilərini yaxından tanıyan, onların çətinliklərini parlamentdə deyə bilən, parlamentdə lazımi təkliflər irəli sürən, seçicilərinin qayğısına qalan, insanların sevgisini, rəğbətini qazanan, daxili və xarici aləmdə öz xidmətilə seçilən və s. keyfiyyətə layiq olan şəxslər mənim üçün ən yaxşı namizəddir.

Hazırki parlamentdə az sayda olsa da amma yaxından izlədiyim, insanlar arasında öz hörmət və rəğbətini qazanmış, bəylər və xanımlarımız var.

Digər seçkilərdə olduğu kimi, bu il keçiriləcək parlament seçkilərini də bir vətəndaş kimi yaxından izləyirəm. Hər zaman olduğu kimi, bu ildə seçkilərə müxtəlif sahələrdən şəxslər qatılıblar. Amma bu seçkilərin digər seçkilərdən fərqli olaraq, daha çox müxtəlif sənət sahiblərinin də seçkilərə qatılmaq niyyətində olduğunu görürəm. Məsələn, "Mən sosial şəbəkədəyəm, burda mənim dostlarım çoxdur”, "Mən yaxşı müğənniyəm məni sevənlər çoxdur”, "Mən X adlı rayondanam, həmin rayonun bütün toylarında aşı mən aparıram, rayon əhalisinin hamısı məni tanıyır”, "Mən yaxşı aşpazam, mənim müştərilərim çoxdur”, "Mən su pulu yığanam, bütün evlər məni tanıyır” və s. bu kimi sahənin insanları, özlərini ən yaxşı namizəd kimi görürlər. Doğrudanmı, insanların hər gün ünsiyyətdə olduğu, yaxından tanıdığı ən yaxşı namizəd bu şəxslərdir ? Bəlkə də həqiqət budur.

İnsanlar savadlı bir insana səs verərək, öz dairəsindən seçdiyi deputatı, bir dəfə də olsun seçkidən sonra üzünü görməyib, bir xeyiri gəlmədiyi, parlamentdə səsini eşitmədiyi şəxslərdənsə, onlara bir aşpazın, müğənninin və s. daha çox xeyri dəyəcəyinə inanırlar.

Seçkilərə böyük sayda gənclərimizin də çox qatılmağını nəzərə alsaq, bu seçkilərin daha çox maraqlı olacağına bir işarə verir. Gənclərimiz digər sahələrdə olduğu kimi, bu seçkilərdə də seçilərək, parlamentdə çox olmalarına şübhə etmədən sevinirəm. Aparılan bu gənclər siyasəti hər bir gənc kimi məni də çox sevindirir. Amma diqqətimi çəkən bir məqam da var. Bu seçkilərdə ən çox hüquqşunasları, jurnalistləri, ictimai-siyasi xadimləri, politoloqları, və s. sahənin adamlarının adlarını daha çox olduğunu görürəm. Bir iqtisadçı gənc kimi, gözüm hey bir iqtisadçı gənc namizəd axtarır, çox təəssüflər olsun ki, mən bunu hələ ki görə bilmirəm. Bəs bu nəyə işarə olduğunu, sualımın cavabını hələki analiz edirəm.Çox güman ki, axtardığım sualıma cavabları, seçkilərdən sonra daha dəqiq biləcəyəm.

Mən öz səsimi, qapımı döyüb məndən imza, səs istəyən şəxsə verəcəm. Ən azından insanları bir yerə toplamağı bacaran, onlara öz platformasından danışan, natiqə, real şəxsə, ən yaxşı namizədə səsimi verəcəm.

Bəs siz kimə səs verəcəksiniz ? Bunu indidən analiz edərək, namizədinizi daha yaxından tanıyaraq, özünüz seçin. Sonra yenə gec ola bilər.

"ƏN YAXŞI NAMİZƏD” bizlərin, özümüzün seçdiyi namizəddir.

Seçkilərə qatılan bütün layiqli namizədlərimizə, uğurlar arzu edirəm.

Arzu Qafarlı