Sumqayıt sakini Məlahət Abdullazadə tərəfindən Xeberle.com-un poçt ünvanına şikayət məktubu daxil olub. Məktubu olduğu kimi diqqətinizə çatdırırıq:

"29.08.2015-ci il saat 21:00 radələrində qızım və həyat yoldaşımla birlikdə Sumqayıt şəhəri, 10-cu mikrorayonla keçmiş "Qarabağ” kinoteatrına tərəf səki ilə gedərkən təkər - əyləc səsinə diksindik. Hər ikimiz çevrilib maşın yoluna baxdıqda 50 BG 897 dövlət nömrə nişanlı bej rəngli 011 markalı avtomaşının yolun hərəkət hissəsindən çıxıb səkiyə - bizə doğru hərəkət etdiyini gördük. Nə baş verdiyini anlamağa macal tapmamış maşının səki ilə yoldaşıma, mənə və yanımla gedən qızıma çatdığını və son anda sükanı bir az sola döndərib istiqamətini dəyişərək bizdən irəlidə gedən qadınlara və daha irəlidə olan körpə uşaqlara, böyüklərə tərəf getdiyini gordük. Qışqırtı, maşının əyləc səsi, sağa-sola qaçıb canını ölümdən qurtarmaq istəyən şokda olan insanlar və asfaltın üstündəki qara təkər trayektoriyaları... Bir anlıq xarici filmləri xatırladırdı. Maşın elə səki ilə sonacan yolunu davam etdirib adıçəkilən kinoteatrın arxasında dayandı. Bir neçə kişi onun ardınca qaçdı. Onların artıq avtomobilini tərk etmiş "adam”ın kimliyini yanında dayanan adamlardan soruşaraq təyin edincə mən də artıq 43 saylı Sumqayıt birinci Seçki Dairəsinin qarşısında idim. Saat 21:12-də mən 102 xidmətinə hadisə və sərxoş sürücü barədə məlumat verdim. Xidmətdən mənə yerimi tərk etməməyi və polislərin göndəriləcəyini bildirdilər. 21.19-dan 22.44-ə qədər 0186552381, 0554134141, 0773263535, 0556716125 və bir necə gizli nömrələrdən zənglər edilərək bildirildi ki, kameralara baxıblar və belə bir maşının hərəkətdə olduğunu görüblər. Şəxsən mən 99 YP 608 dövlət nömrə nişanlı avtomobili idarə edən yol polisinin əməkdaşına səkidəki təkər izlərini göstərdim. Bizim kimi qorxulu anlar yaşayan, sonradan adını öyrəndiyimiz 10-cu mikrorayon sakini Rafael adlı oğlan yaxınlaşıb "qəhrəman”ın yaxınlıqdakı kafedə artıq pivə içdiyini dedi. Polislər gələndə "qəhrəman” artıq oranı da tərk etmişdi. Maşının nömrəsinə əsasən polislər bu adamın 10-cu mkr, səhv etmirəmsə, ev 20-də yaşayan Seymur adlı birinin olduğunu təyin etdilər. Biz evə çatanda zəng gəldi ki, bəs xanım, biz həmin adamın həyətindəyik, amma qonşular bu maşının bu gün həyətdən heç çıxmadığını deyirlər. Əlbəttə, axı onların və övladlarının üstünə sürülməyib... Mən də cavab olaraq dedim ki, maşının nömrəsi 50 BG 897, qabaq buferi yoxdur, elədirmi? İndi zəhmət olmasa kapotu açın və əlinizi matorun üstünə qoyun və görün istidir yoxsa yox. Gülməlidir vallah. Yəni bizim polislərin qabiliyyəti o həddədir ki, qadın onlara yol göstərir?!

Bir neçə dəqiqədən sonra zəng vurub maşının cərimə meydançasına, yiyəsinin isə bölməyə aparıldığını öyrəndim. 08.09.2015-ci il tarixində yenidən 102 xidmətinə zəng vurub niyə nəticə ilə məlumatlandırılmadığımı soruşanda, xəttin o başında dedilər ki, araşdırma gedir və siz niyə ərizə yazmamısınız? Cavab verdim ki, mənim şok vəziyyətimdə, hətta sonra da məndən bunu istəyən olmadı. 2 gün sonra 055 6557700 nömrəsindən zəng vuraraq məni posyolkadakı yol polis bölməsinə izahat yazmağa dəvət etdilər. Mən isə bildirdim ki, araşdıma üçün izahatın nə rolu var ki, əgər belə qısa müddət ərzində maşın da, sürücü də azadlıqdadır? Əvəzində belə cavab aldım ki, həmin adam cəriməsini ödəyib, maşını çıxardıb. Ən sonda da bildirdi ki, ərizə-izahat yazmağa ehtiyac yoxdur. Bu sözdən sonra mübahisə etdim və bildirdim ki, mən məni və ailəmi az qala həyatdan məhrum edən adamla bağlı götürülən belə yumşaq nəticədən narazıyam. Belə çıxır ki, səkidə üstümüzə sərxoş vəziyyətdə maşın sürəcək hər bir kəs polisin səsləndirdiyi 300 manat cərimə ödəyib yenidən qənimimizə çevriləcək? Bildiyim qədər təsvir etdiyim hadisəni törədən sərxoş sürücü sürücülük hüququndan məhrum olunmalıdır. Ola bilməz ki, belə hərəkətin qanunvericilikdə bu qədər yumşaq cəzası olsun. Ona görə də üzümü sizə tutub xahiş edirəm ki, bu məsələyə aydınlıq gətirəsiniz.

Əvvəlcədən təşəkkür edirəm.