Balıq
ovu bir çox insanlar üçün "xəstəliyinə" çevrilib. Özünün işi, peşəsi
olsa da, əlavə vaxt tapan kimi balıq tutmaq üçün uzaq yerlərə, rayonlara
yollanan insanlar heç də az deyil.
Amma bəziləri balıq tutmağı yox, balığın kökünü kəsməyi sevir. Bu
formada təbiətə, ekologiyaya zərər vuran insanlar hələ də aramızda
yaşayırlar. Onlardan bir neçəsi bu yaxınlarda Sumqayıt şəhərində peyda
olub.
Musavat.com xəbər verir ki, Sumqayıt şəhərinin 18-ci
mikrorayon adlanan ərazisindəki kanalda kütləvi balıq qətliamı baş
verib. Özlərini balıqçı hesab edən naməlum şəxslər, kanala naqillər
vasitəsi ilə elektrik verərək, suda olan balıqları öldürüblər.
Ekologiya düşmənləri özlərinə sərf edən balıqları sudan çıxarıb,
aparıblar. Geridə isə hələ balaca olan, 1000-ə yaxın müxtəlif növdə olan
balıq ölmüş halda suyun üzündə qalıb.
Son zamanlar bu tipli hadisələr çoxalıb. Özlərini əziyyətə salıb,
tilovla balıq tutmaq istəməyənlər, bu yola əl ataraq, işlərini
rahatlaşdırırlar. Amma düşünmürlər ki, onların cibləri bir az pul
görəcək deyə, balıqların kökünü kəsmək olmaz.
Suya elektrik verən zaman, orada olan bütün canlı aləm məhv olur.
Bu da ekologiyamıza dəhşətli ziyan verir. Bunun qarşısını mütləq almaq
lazımdır.
Hadisə şahidlərinin verdiyi məlumata görə, həmin şəxslər bir neçə gün bu çirkin əməl ilə məşğul olublar: "Mən
bu kanalın yanından gedib-gəlirəm. Bir neçə nəfər kanalda "tok"la balıq
tuturdu. 220 voltluq naqilləri dəmir bir parçaya bağlayıb, atmışdılar
kanala. Guya balıq tuturlar. İndi isə həmin kanalda xırda balıqlar
ölüblər və suyun üzünə çıxıblar. Bu, insanlıq deyil. Bütün balıqları
məhv ediblər".
Məlumat üçün qeyd edək ki, bəzən elektriklə balıq "tutan" şəxslər,
qazdıqları quyuya, özləri düşürlər. Belə ki, suya elektrik buraxmaqla
balıq tutmaq istəyən bəzi "balıqçılar", ehtiyatsızlıqdan özləri elektrik
naqilinə toxunur və hadisə yerindəcə ölürlər.
Suya elektrik ötürərək balıq tutmaq istəyənlərə cəza verilməsi
mütləqdir. Onların etdikləri bu hərəkətin qarşısı alınmasa, yaxın
zamanlarda kanallarda, göllərdə, çaylarda balıq tükənəcək.
Aidiyyəti qurumları öz işlərini daha məsuliyyətli görməyə dəvət edirik.
Xəbərdən istifadə edərkən istinad etmək vacibdir.
