Xəbər verildiyi kimi, şənbə günü axşam saatlarında Sumqayıt şəhərinin girəcəyində "Sülh” küçəsinin sağ tərəfidəki ərazidə ağaclar kütləvi şəkildə kəsilib. Qeyri-iş günü olduğuna görə, şəhər icra hakimiyyəti rəsmilərindən heç bir açıqlama əldə edə bilməmişdik. Bu gün səhər saatlarından başlayaraq şəhər icra hakimiyyəti rəsmiləri ilə əlaqə yaratmağa çalışdıq. Təəssüf ki, zənglərimizə cavab verən olmadı. Xatırladaq ki, şəhər icra başçısı Zakir Fərəcov bu günlərdə şəhər ictimayyiəti qarşısında çıxış edərkən bildirmişdi ki, şəhərin əsas girişindən "Göyərçin” abidəsinə qədər avtomobil yolu 5 metr sağ və sol istiqamətdə genişlənəcək.

Əldə etdiyimiz məlumata görə artıq əraziyə texnika cəlb edilib və ağaclar da məhz bu səbəbdən kəsilib. Məsələ ilə bağlı Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimovaya müraciət etdik. Mətbuat xidmətinin rəhbəri bildirdi ki, artıq bu barədə nazirliyə məlumat daxil olub. Nazirliyin əməkdaşları məsələni araşdırmaq üçün cəlb olunublar. Məsələ araşdırılıdqdan sonra, Ekologiya və Təbii sərvətlər nazirliyi tərəfindən KİV-ə ətraflı açıqlama veriləcək.

Aytən Əli

Xeberle.com