“Əl əli yuyar, əl də qayıdıb üzü”

RAMİL ZEYNALLI
[email protected]

“Kimlərsə gecə yatıb səhər ayılaraq fikirləşir ki, görəsən, nədən pul çıxara bilər? Sonra da qanuna özü istədiyi formada düzəlişlər edir, nəticədə də kimlərsə, oturduğu yerdə korrupsiya yolu ilə milyonlarla pul qazanır, kimlərinsə də hüquqları pozulur. İnsan övladı halal pulla qurulan daxmanın, haram pulla qurulmuş və üstəlik hasara alınmış imarətdən fəlakətlərə qarşı daha davamlı olduğunu düşünürmü?”

 Rüşvətin müasir və daha təkmilləşmiş forması olan korrupsiya təəssüf ki, bəzən cəmiyyətdə adi hal kimi qarşılanır. Nə də olsa, “pulu verib, canımı qurtaracağam” anlayışı da sanki formalaşıb insanlar arasında. Bəs bu əməllərin, onu alan günahkar əllərin axırı nə olur? Yəqin cavabı ilə əzabı o dünyadadır. Çünki cəmiyyətdə bu əllərin “fəaliyyəti” artıq inkişaf edib, üstəlik bir çox sahələrdə.

Bəlkə də bu insanların bir qismi “rüşvət almasam, dolana bilmərəm” fikriylə bu əməli törədirlər. Görəsən, o pullu insanların, rüşvətxorların haram pullarla yaratdıqları imarət fəlakətin qarşısında tab gətirə biləcəkmi? Fəlakət sözü təbii fəlakətləri ifadə etmir. Söhbət insan övladının başına gələ biləcək fəlakətlərdən gedir. Yəqin ki, öz cibini düşünmək Allahı da unutdurub elələrinə.

Cəmiyyətdə rüşvət bir çox sahələrdə öz rolunu göstərdiyi kimi, hətta gələcək üçün zəmin yaradan elm müəssisələrində də çox gözəl şəkildə inkişaf edib. Elmini, təhsilini rüşvətlə başa vuran bir vətəndaşımızın gələcəkdə ölkəyə nə xeyri olacaq?! Və ya öyrəncəlik olan bu “sənət yolunu” onların da davam etdirməyəcəyini kim deyə bilər? Hazırda bu əməli törədənlər bəlkə də bir vaxt, “Mən əsla rüşvət almaram” fikrində olublar. Amma daha sonra oturduqları yumşaq və komfortlu kreslolar onlara öz sözlərini unutdurub.

Rüşvətin alınması onu alanlara sərf etdiyi kimi, verilməsi də bir çox vətəndaşlara sərf edir. Bir çoxlarında belə bir sual yarana bilər. Verən razı, alan razı! Sənə nə?! Bəs bu sualı verən insan rüşvətin əzdiyi xalqı görə bilirmi? Söhbət hansı xalqdan gedir? Pulu olmadığına görə xəstəxanalarda ən son sırada müayinədən keçmək haqqına sahib olan insanlardan, bürokratik əngəllərdən əziyyət çəkən insanlardan, pulun gücünə əllərindən mal varlıqları alınan insanlardan və digər bu kimilərindən. “Əl çirki” hesab edilən pula görə bizlərə bu haqsızlıq edilsə, bir çoxumuzda əsəb göz yaşları axar hətta. Amma bütün bu haqsızlıqlara dözənlər var. Pulun varsa, “dayday”ın varsa, işlərin yağ kimi gedəcək.

Həyatlarını rüşvət üzərində quranlar evlərinin divarlarını puldan qura biləcəklər?

Siz siz olun, nə rüşvət verin nə də alın!

P.S. İndi hamı qanunu əyirsə, bir gün qanun hamını əyəcək.