Yük maşınlarının və taksilərin sahiblərinə qan udduran nəqliyyat müfəttişlərinə Bakı küçələrində rast gəlinmir
15 oktyabr tarixində ölkə başçısının imzaladığı fərman ilə əlaqədar olaraq Nəqliyyat Nazirliyinin inzibati xətalara cavabdeh olduğu bəzi səlahiyyətləri əlindən alınaraq Baş Dövlət Yol Polisi İdarəsinə verilib.
Artıq Bakı küçələrində Nəqliyyat Nazirliyinin məşhur "qoçu”larının fəaliyyət göstərmədiklərinin şahidi olub. Belə ki, şəhərdə Nəqliyyat Nazirliyinin "qoçu”larının dayandığı yerlərdə artıq yol polisinin əməkdaşları xidmət aparırlar.
Əvvəllər nəqliyyat müfəttişləri dayandıqları yerlərdə onlara rast gəlmədik. Sürücülər əməkdaşımıza bildiriblər ki, dünən (15 oktyabr) axşamdan etibarən, nazirliyin "qolu zorlu” əməkdaşlarına rast gəlməyiblər. Beləliklə, Ziya Məmmədovun "qoçu”larının at oynatmasına da son verilir.
Xatırladaq ki, ölkə başçısının fərmanına əsasən Nəqliyyat Nazirliyinin aşağıdakı səlahiyyətləri əllərindən alınıb:
- Taksi tanınma nişanları, taksometr və ya sərnişin və baqaj daşınması qaydaları ilə müəyyən edilmiş digər məlumat göstəriciləri olmadan taksi minik avtomobili ilə sərnişin daşımalarının həyata keçirilməsi (150-2.1.2-ci maddə);
- sərnişin və baqaj daşınması qaydaları ilə müəyyən edilmiş daşınma sənədləri olmadan sərnişin daşımalarının həyata keçirilməsi (150-2.1.7-ci maddə);
- avtomobil nəqliyyatı ilə yük daşınması qaydalarında nəzərdə tutulmuş daşınma şərtlərinin pozulması (150-3-cü maddə);
- xüsusi razılıq (lisenziya) olmadan avtomobil nəqliyyatı ilə sərnişin və yük daşınması, yaxud lisenziya şərtlərinin pozulması (150-4-cü maddə);
- avtomobil yollarında , prospektlərdə, küçələrdə, təhkim və mühafizə zolağında yol hərəkətinin təhlükəsizliyinin pozulması ilə bağlı olan xeyli xətalar (163-cü maddə);
- iriqabaritli və (və ya) ağırçəkili nəqliyyat vasitələrinin icazə verilən qabarit, çəki və yüklə birlikdə oxa düşən kütlə parametrlərinə dair tələblərin pozulması (163-1-ci maddə);
- avtobuslarda və taksi minik avtomobillərində sərnişinlərinin icbari fərdi qəza sığortasının olmaması və bəzi başqa xətalar (163-1-ci maddə)
(Yeni Müsavat)
Xəbərdən istifadə edərkən istinad etmək vacibdir.
