Sentyabrın 15-dən etibarən rayon maşınlarının paytaxt qadağası ayrıseçkilik kimi qiymətləndirilir və insanların narazılığına səbəb olub.
Bundan ən çox əziyyət çəkənlər fermerlərdir. Paytaxt qadağası onların məhsullarının əllərində qalmasına səbəb olur. Ona görə gecə saatlarında məhsullarını "alverçilərə” dəyər,dəyməzinə satıb geri qayıdırlar. Bundan istifadə edən "işbazlar” isə şəhər bazarlarında qiymətləri qaldırır.
Milli Məclisin Aqrar siyasət komitəsinin sədr müavini Eldar Quliyev açıqlamasında rayon maşınlarının şəhərə buraxılmamasını düzgün proses hesab etsə də, kənd təsərrüfatı məhsulları gətirən maşınlar üçün ayrıca mexanizmin işlənməsinin vacib olduğunu bildirib.
O qeyd edib ki, kənd təsərrüfatı məhsulları gətirən maşınlara rayon icra hakimiyyəti və ya hansısa təşkilatdan sənəd verilməlidir ki, şəhərə buraxılsın.
"Çünki yay mövsümündə kənd təsərrüfatı məhsullarının bir maşından o biriniə yığılması nəticəindən məhsul xarab olur. Bu, kifayət qədər problem yaradır, həm də vaxt itir. Onlar üçün müəyyən icazə olmalıdır və 48 saat və ya bir gün vaxt verilməlidir ki, məhsulu təhvil verildikdən sonra qayıtsınlar”.
E.Quliyev vurğulayıb ki, qadağa ilə əlaqədar kənd təsərrüfatı məhsullarının paytaxta az gəlməsi qiymətlərə təsir edəcək. Bəzi işbazlar da bununla pul qazanmaq isrəyirlər.
"Bunun mexanizmi işlənməlidir. Kənd Təsərrüfatı Nazirliyinin yerli strukturları açılıb. O strukturlar vasitəsilə insanlara sənəd verilə bilər. Biri var məhsulu möhtəkirlər gətirib satsın, biri də var ki, məhsulu istehsal edən gətirsin. Belə bir cəmiyyətdə yaşıyırıq ki, bundan istifadə edənlər də olur.
Həmçin insanlar Bakı maşınları ilə müqavilə bağlamaqla məhsulu yığıb gətirə bilər. Ümumiyyətlə tədarüklə məşğul olanlar lazımdır. Əks halda işbazlar qiyməti istədikləri kimi qaldıracaqlar”.
Deputat qeyd edib ki, kənd təsərrüfatı məhsullarının qiymətlərinin bir müddət tənzimlənməsi yaxşı olardı.
"Dərman vasitələrinə dövlət tərəfindən nəzarət olundu. Hesab edirəm ki, müvəqqəti olsa da bazar iqtisadiyyatı şəraitində qiymətlər dövlətin nəzarətində olmalıdır. Baxmalıdır ki, necəyə alıb necəyə satır. Hesab edirəm ki, dövlətin hansısa strukturun nəzarəti olsaydı, yaxşı olardı”.(Modern.az)
Xəbərdən istifadə edərkən istinad etmək vacibdir.
