43 saylı Sumqayıt üçüncü seçki dairəsinin 13 saylı Məntəqə Seçki Komissiyasının sədri Səfərova Tahirə Astan qızı qanunsuzluq edir. Xeberle.com xəbər verir ki, bu barədə məlumatı Qaynar.info-ya 43 saylı dairədən olan namizədlərdən biri verib.

Onun sözlərinə görə, 22 saylı tam orta məktəbin direktoru olan Tahirə Səfərova məntəqə üzvlərini məntəqənin ərazisinə daxil olan mənzillərə göndərərək seçicilərin şəxsiyyət vəsiqələrinin nömrələrini qeydiyyata alır.

Namizəd bildirir ki, məktəb direktoru şəxsi nüfuzundan istifadə edərək məntəqə üzvləri vasitəsi ilə sakinlərin ailə üzvlərinin ad, soyad, təvəllüd və vəsiqələrinin seriya nömrələrini qeyd etdirir. O, çox güman ki, səsvermə günü məntəqəyə gəlməyən seçicilərin adından lazım olan namizədin xeyirinə səs verdirəcək. 

İttihamlarla bağlı məntəqə sədirindən münasibət öyrənmək istəsək də, bu baş tutmadı.