43 saylı Sumqayıt üçüncü Seçki Dairəsindən Yeni Azərbaycan Partiyasının (YAP) deputatlığa namizədi Muxtar Babayevin 10-cu mikrorayon seçiciləri ilə görüşü keçirilib. Namizədin vəkillərinin də iştirak etdiyi tədbiri giriş sözü ilə açan YAP Sumqayıt şəhər təşkilatının sədri Asif İmaməliyev ölkəmizin növbəti siyasi proses ərəfəsində olduğunu deyib. Əhalinin bundan əvvəlki seçkilərdə olduğu kimi, bu dəfə də Yeni Azərbaycan Partiyasının namizədlərinə səs verəcəklərinə əmin olduğunu bildirən A.İmaməliyev sumqayıtlıların da bu prosesdə fəallıq göstərəcəklərinə əminliyini ifadə edib. 
Çıxış edən Muxtar Babayev əsası Ümummilli liderimiz Heydər Əliyev tərəfindən qoyulan Azərbaycan dövlətinin sosial inkişaf, iqtisadi tərəqqi, beynəlxalq aləmə inteqrasiya siyasətinin ölkəmizi böyük inkişaf yoluna çıxardığını dilə gətirib. Bildirib ki, Prezident İlham Əliyevin bu siyasi kursu uğurla davam və inkişaf etdirməsi Azərbaycanı regionun lider ölkəsinə çevirib: "Əhalinin həyat şəraiti yaxşılaşır, sosial problemlər həll edilir, şəhərlərimizdə geniş abadlıq-quruculuq işləri aparılır. Siyasi, iqtisadi, hüquqi, sosial islahatlar davam etdirilir, Azərbaycanın hərbi qüdrəti artır. Bu cür dinamik quruculuq dövründə Milli Məclisin üzvlüyünə namizədliyimin yenidən Yeni Azərbaycan Partiyası tərəfindən irəli sürülməsi bu işlərdə daha yaxından iştirak etməyimə və sumqayıtlıların etimadını doğrultmağa şərait yaradır”.
M.Babayev əlavə edib ki, son illərdə ölkəmizdə aparılan siyasətin nəticəsində bütün sahələrdə böyük inkişaf müşahidə olunur. Bu inkişafdan Sumqayıt şəhərinə də pay düşdüyünü söyləyən namizəd dövlət başçısının hər zaman Sumqayıta qayğı ilə yanaşdığını önə çəkib.
Çıxış edən seçicilər noyabrın 1-də keçiriləcək seçkilərdə YAP-ın namizədini dəstəkləyəcəklərini bildiriblər.
Pərviz SADAYOĞLU
yeniazerbaycan.com