Redaksiyamıza Saray sakini İbrahimov Rövşən Bəhmən oğlu tərəfindən şikayət daxil olub. R.İbrahimov şikayətində qeyd edir ki, 2006-ci ildə Saray qəsəbəsinin  bələdiyyəsinə ona düşəcək pay bölgüsü ilə bağlı yazılı ərizə verib. Bundan sonra ərizəsi qəbul edilib və bələdiyyə sədri Ənvər Pirəliyev ona düşən torpağının nömrəsini verib və bildirib ki, torpaq ona veriləcək. 

Ancaq sonradan qəsəbə sakini ona çatacaq torpağı ala bilməyib. Ötən 8 ildə dəfələrə cəhd etsə də torpağın sənədlərini ala bilməyib. Ümumiyyətlə, vətəndaşa yazılı məktub - cavab da gəlməyib. Sonuncu dəfə isə 9 ay bundan əvvəl bələdiyyə sədri ilə görüşən Rövşən İbrahimova bələdiyyə sədri ondan pul tələb edib. 

“Torpağın sotuna 2500 manatdan pul ödə, torpağı sənə verim. Hal-hazırda torpağın dövlət rüsumu qalxıb” – deyə bələdiyyə sədri Ənvər Piriyev bildirib. Rövşən İbrahimov yazır ki, bələdiyyə sədrinə etiraz edərək torpağı 8 il əvvəl aldığını və indiki qiymətlərlə rüsumu ödəyə bilməyəcəyini deyib. Sitat: “torpağımı vaxtında versəydiniz, həmin rüsumla mənim gücüm çatardı. İndi isə bu pulu ödəməyə imkanım yoxdur. Qəsdən bu məsələni yubadırsınız ki, torpağı əldə edə bilməyim”. 

Məsələ ilə əlaqədar bu gün jurnalistlər və Rövşən İbrahimov mayın 26-da səhər saatlarında Saray bələdiyyəsinə getsə də idarədə heç kimi tapa bilməyib. Yalnız özünü “buxalter” kimi təqdim edən qadın olub. Qadın bildirib ki, bələdiyyə rəhbərliyi - sədr Ənvər Pirəliyev, müavinləri -  Əlirahim Allahyarov və Vəsilə Əbülhəsənova qazon əkməyə gedib. (musavat.com)