Ağsu rayon məhkəməsində Sevda Xəlilovanın iddiası üzrə mülki işə baxılıb. Bu barədə Xeberle.com-a iddiaçının nümayəndəsi, hüquq müdafiəçisi Elçin Məmməd məlumat verib. Onun sözlərinə görə, S.Xəlilova avtomobil almaq məqsədi ilə "Yunayted Kredit Bank” ASC-dən 2011-ci ildə kredit götürüb və öhdəliklərin icrasının təmin edilməsi məqsədilə iddiaçıya məxsus avtomaşın ipoteka müqaviləsi ilə bank qarşısında yüklü edilib. "Həmin ərəfədə Sevda Xəlilovanın səhhəti qəfil ağırlaşıb və xəstəliyilə əlaqədar maşını aldığı gündən idarə edə bilməyib. Nəqliyyat vasitəsini mülki etibarnamə əsasında Faiq Cabbarova satıb və bundan sonra onun maşının taleyi barədə məlumatı olmayıb. Sonuncu şəxs vaxtında ödənişlər edib və bankla hər hansı problem yaranmayıb.” – deyə hüquq müdafiəçisi bildirib. Elçin Məmməd onu da qeyd edib ki, sonradan iddiaçının məlumatı olmadan qeyd edilən maşın digər şəxsə-Vasif Məmmədova satılıb və bankla onun arasında 2012-ci ildə zaminlik müqaviləsi bağlanıb. "Həmin zaminlik müqaviləsində Vasif Məmmədov kreditor qarşısında Sevda Xəlilovanın kredit müqaviləsi üzrə öhdəliklərin tam həcmində yerinə yetirilməsinə görə məsuliyyəti tam olaraq üzərinə götürüb. 2014-cü ilin əvvəlindən S.Xəlilovaya bank tərəfindən xəbərdarlıq edilib və bildirilib ki, onun banka borcu var, ödəniş olunmur.
Vasif Məmmədovun istifadəsi zamanı nəqliyyat vasitəsi yararsız hala salınıb və bank tərəfindən alınaraq xüsusi dayanacaqda saxlanılıb. "Yunayted Kredit Bank” ASC Sevda Xəlilovaya qarşı pul tələbi ilə bağlı iddia qaldırıb və Sumqayıt şəhər Məhkəməsi iddianı təmin edib, qətnamə icraya yönəlib.” – deyə E.Məmməd bildirib. Hüquq müdafiəçisi qeyd edib ki, müdafiə etdiyi şəxsin hüquqları pozulub və V.Məmmədovla bank arasında bağlanmış zaminlik müqaviləsinə əsasən sonuncu kreditor qarşısında borclunun kredit müqaviləsi üzrə öhdəliklərin tam həcmdə yerinə yetirilməsinə görə məsuliyyəti üzərinə götürüb. İddiaçı tərəf hesab edib ki, hərəkətləri ilə V.Məmmədov ona külli miqdarda ziyan vurub və üzərinə düşən öhdəliyi yerinə yetirməyib. Hakim Tahir İsmayılovun sədrliyi ilə keçirilən prosesdə iddia tələbi təmin edilib.