İqtisadiyyat və Sənaye Nazirliyi yay mövsümünün başlaması ilə əlaqədar istirahət mərkəzlərində yoxlamalara başlayıb.

 Bu barədə virtualaz.org saytına nazirlikdən məlumat veriblər.

 Xəbərdə deyilir ki, Bakı-Sumqayıt yolunun 29-cu km-də yerləşən və iş adamı Gülsarə Məmmədovaya məxsus olan istirahət mərkəzində monitorinq keçirilib.

 Bəlli olub ki, istirahət mərkəzində əhaliyə təklif edilən yeməklərin hazırlanmasında istifadə müddəti bitmiş, həmçinin mənşəyi bəlli olmayan ərzaqlardan istifadə edilir.

 Nazirlik Xəzər rayonu, Zirə qəsəbəsində Mirhüseyn Ağayevə, Xətai rayonu, S.Mehmandarov küçəsi, ev 48 ünvanında “Kamran” firmasına məxsus obyektlərdə də eyni vəziyyəti aşkarlayıb. Ümumilikdə 100 kiloqramdan artıq ərzaq məhsulları məhv edilib.

 Nazirlik vətəndaşlara xəbərdarlıq edərək xüsusilə yay aylarında diqqətli olmağı, baş verən nöqsanlarla bağlı məlumat vermələrini tövsiyə edir.

 Qeyd edək ki, qanuna görə, vətəndaşın istirahət mərkəzləri və ya kafelərdə yeməklərin hazırlanma şəraiti ilə tanış olmaq, ərzaqların saxlanılma şəraiti və sənədləri tələb etmək hüququ var.