Tanışlıq saytları HİV virusuna (Human Immunodeficiency Virus) yoluxma hallarının sürətlə artmasına və zöhrəvi xəstəliklərin geniş yayılmasına gətirib çıxara bilər.

İKT.lent.az-ın "The Sun” qəzetinə istinadən verdiyi məlumata görə, bunu HİV və seksual sağlamlıq üzrə Britaniya Assosiasiyasının həkimi Piter Qrinhaus deyib. O bildirib ki, "Tinder” və ya "Happn” kimi tanışlıq xidmətləri bir gecəlik seksual əlaqələri təşviq edir. "Bu cür xidmətlər vasitəsilə çox tez müddətdə patnyor tapmaq mümkündür. Lakin partnyorlar nə qədər tez dəyişirsə, hansısa infeksiyaya yoluxma ehtimalı da o qədər artır. Əgər çoxlu sayda insan bu cür yaşayarsa, əhali arasında HİV virusu partlayışı baş verə bilər”, - deyə o, söyləyib.  

"Hapnn” şirkətinin əməkdaşı Mari Kosnard isə xidmətin infeksion xəstəliklərin artması ilə hər hansı əlaqəsi olmadığını vurğulayıb: "Cəmiyyətdə seksual partnyor, nikah, boşanma kimi məsələlərə münasibətin liberallaşması müşahidə edilir. Zöhrəvi xəstəliklərin artması bu cür xidmətlərlə əlaqəli deyil. Problem kifayət qədər genişdir. İnsanlar seksual sağlamlıq məsələlərində daha çox maariflənməlidir və öz partnyorları ilə harada qarşılaşmalarından asılı olmayaraq, bu məsələyə məsuliyyətli yanaşmalıdır”.