Palçığa, zığa girmişik, necə məqam ötürmüşük
Çox saxta seçki görmüşük beləsi olmayıb hələ.
Bu necə seçkiydi belə?
MSK söylədi gerçək, "seçkilər şəffaf keçəcək,
Vəkilləri xalq seçəcək seçki günü gülə-gülə”
Bu necə yalandı belə?
"Kim seçkiyə burun soxdu, həmin anda o kəs yoxdu”
Üzdən batdı, altdan axdı, xalqa qurdu gizli tələ.
Bu necə seçkiydi belə?
Qanunlar qoyuldu dəmə, tam olanda döndü kəmə.
Fərmanlar, qərarlar demə milləti salmış ələ
Bu necə bir kələkmiş belə?
Bir gün çalındı zurnalar, hər yandan gəldi durnalar.
"Bu dəfə seçim düz olar”-deyib onlar çəkdi zilə
Bu necə seçkiydi belə?
Elə ki, seçim başlandı vəd verənlər sözü dandı.
Önə keçdi kim kalandı, sədrləri alıb ələ.
Bu necə kələkdi belə?
Hələ ulduzlar yatmamış, Günəş üfüqdən doğmamış.
Adamlar çölə çıxmamış hər tini kəsdi bir kələ
Bu necə seçkiydi belə?
Elə ki, qızışdı ara, göz basıldı lotulara,
Doldurdular qutulara, bülleteni şələ-şələ
Bu necə seçkiydi belə?
Neçəsini ovladılar, neçəsini tovladılar,
Ora-bura qovladılar, mindirərək karuselə
Bu necə seçkiydi belə?
Polis hərdən zor elədi, görən gözü kor elədi,
Axır xalqı xar elədi, istəyini verdi yelə
Bu necə
seçkiydi belə?
Yalan yalana calandı, dumduru sular bulandı.
Arzular oda qalandı, ümüdlər qarışdı külə,
Bu necə seçkiydi belə?
Uduzanlar qəmə batdı: udanlar kamına çatdı
Saxtakarlıq at oynatdı ilğım dedi nəhəng Nilə
Bu necə seçkiydi belə?
Doğruya qəbir qazıldı, oğruya mandat yazıldı,
Nizam-tərəzi pozuldu, görə-görə, bilə-bilə
Bu necə seçkiydi belə?
Seçim bizə çoxdan yaddır, seçim ancaq təyinatdır.
Bu da belə bir həyatdır, yaşayırıq ölə-ölə.
Bu necə zillətdi belə?
Millət bunu bilə-bilə, özünü tullayır selə
O qədər düşüb get-gələ polad səhri olub pilə
Bu necə millətdi belə?
Aləm hələ görür yuxu, Şokdan ayılmayıb çoxu
Bu nə dəhşət, bu nə qorxu! Zəlzələdi, ya vəlvələ
Bu necə
seçkiydi belə?
Qəm eləmə daha yetər. Ey millət, vətən bu qədər.
Aylar ötər, illər keçər. Beş ildə gözlə sən hələ.
Ümidini vermə yelə: Bu da bir seçkiydi belə.
Müəllif: Zəhra Aslanova
Xəbərdən istifadə edərkən istinad etmək vacibdir.
