Dünən Bakıda “uçan” piyada keçidi ilə bağlı maraqlı məlumatlar əldə etdik. 

“Xeberle.com” Milli.Az-a istinadən xəbər verir ki, uçan keçid “Grand park” istirahət-yaşayış kompleksinin olub. Kompleksdən bildirilib ki, həmin keçid hələ istifadəyə verilməmişdi. “Keçidin giriş-çıxışı niyə küçəyə yox, kompleksə açılırdı” sualımıza cavab qaranlıq qaldı. “Bu suallarınızı yol təsərrüfatı ilə məşğul olanlara verin. İndi məşğuluq, sabah görüşüb söhbət edərik” cavabı verildi. 

Keçidin uçması ilə bağlı aparılan istintaqla da maraqlandıq. İşi araşdıran Səbail Rayon Polis İdarəsinin müstəntiqi Qüdrət Əliyev Milli.Az-a açıqlamasında bildirdi ki, hələlik cinayət işi faktla bağlı başlanıb. Faktla bağlı Cinayət Məcəlləsinin yol hərəkəti və nəqliyyat vasitələrinin istismarı qaydalarını pozma maddəsi ilə iş başlanıb və araşdırılır. İstintaqın gedişində keçidin qanuni və ya qanunsuz tikilməsi ilə bağlı məsələlər də araşdırıla bilər. 

Keçidin hansı səbəbdən ümumi deyil, bir kompleks üçün tikilməsi ilə bağlı “Azəryolservis” ASC-nin mətbuat xidmətinin rəhbəri Pünhan Mürsəliyevə suallarımız olsa da, qurum rəsmisi dəfələrlə etdiyimiz zəngləri cavabsız qoydu.