Rusiyaya məxsus təyyarənin Misirdən Sankt-Peterburqa uçarkən qəzaya uğraması Azərbaycanda turizm şirkətlərinin işinə mənfi təsir göstərir.

224 nəfərin öldüyü qəzadan sonra Rusiyanın Misirə uçuşları dayandırması və eləcə də hadisənin İŞİD tərəfindən törədilməsi iddiası Azərbaycanda da narahatlıqla qarşılanır.

Apardığımız araşdırma zamanı məlum olub ki, Azərbaycandan istirahət üçün Misirə getmək istəyən insanlar bu olaydan sonra fikirlərindən vaz keçməli olublar.

"Miracel Travel”-dan əməkdaşımıza bildiriblər ki, Misirə birbaşa uçuş olmasa da Gürcüstan vasitəsilə turlar təşkil olunur. Şirkətdən həmçinin qeyd edilib ki, hazırda bu ölkəyə getmək istəyənlərin sayı azlıq təşkil edir.

"Royal Travel”in tur operatoru son günlər bu istiqamətdə biletlərin az satıldığını deyir: "Misir istiqamətində uçuşlar az olur. Ancaq bu istiqamətdə əvvəlcədən bilet bron etdirib, qaytaranlar olmayıb. Hazırda müraciət edənlərin sayı çox azdır".

"Freestyle Safari” turizm şirkətindən bildirilib ki, təyyarə qəzası onların işinə təsir etməyib. 
"Kings Travel” şirkətinin tur təşkilatçısının sözlərinə görə, məlum təyyarə qəzasından sonra səyahətçilərin əksəriyyəti qorxub, sifarişlərini geri götürüblər: "Kim qorxursa getmir. Amma reyslərdə heç bir dəyişiklik yoxdur. Doğrudur, səyahət edənlərin sayında azalma hiss olunur”. 

"Dervish Travel" turizm şirkətindən verilən məlumata görə, Misirə getmək üçün onlara müraciət edənlər arasında müəyyən narahatlıq keçirənlər var: "Əvvəlcədən Misirə getmək üçün bilet almış insanlar bizə müraciət edərək son olaylara görə narahat olduqlarını, eyni hadisənin onların da başına gəlmələrindən qorxduqlarını deyirlər”. 

Digər turizm şirkətləri də Misirə getmək istəyən insanlar arasında təyyarə qəzasından sonra təşviş yarandığını gizlətməyiblər.