Azərbaycan Demokratik Tələbə Gənclər Təşkilatı sentyabrın 1-dən 3 ay müddətində davam edəcək, "Gənclər siyasətinin Azərbaycan modeli” Beynəlxalq Gənclər Forumu adlı maariflənmə, təcrübə-informasiya mübadiləsi və qarşılıqlı əməkdaşlığı nəzərdə tutan layihənin icrasına başlayıb.
Təşkilatdan Xeberle.com-a verilən məlumata görə, Prezident yanında Gənclər Fondunun maliyyə dəstəyi və Gənclər və İdman Nazirliyinin dəstəyi ilə gerçəkləşən Beynəlxalq Gənclər Forumu "Gənclərin fəal iştirakına nail olaq” devizi və çağırışı altında 15-19 noyabr tarixində "Azərbaycanın 2015-ci il Gənclər Paytaxtı” – İsmayıllı rayonunda keçiriləcək.
Paytaxtımıza təşrif buyuran 13 ölkənin 22 nəfər gənc lideri 2 gün ərzində Bakıda bir sıra görüşlər keçirəcək, şəhərimizin tarixi, milli-mədəni abidələri və görməli yerləri ilə tanış olacaqlar. Beynəlxalq Gənclər Forumunun işinə İspaniya, Belçika, Polşa, Bolqarıstan, Macarıstan, Latviya, Xorvatiya, Türkiyə, Makedoniya, Bosniya və Herseqovina, Ukrayna, Moldova və Gürcüstan təmsilçiləri qatılıblar.
Noyabrın 16-da İsmayıllı şəhəri Heydər Əliyev Mərkəzində Beynəlxalq Gənclər Forumunun rəsmi pleanar açılışı olacaqdır. Forumun proqramına plenar hissə ilə yanaşı, 4 panel müzakirəsinin aparılması, beynəlxalq gənclər əməkdaşlığı sahəsində təcrübə və informasiya mübadiləsi şəbəkəsinin qurulması, İsmayıllı Bəyannaməsinin qəbulunu, kitab çapı, yayımı və geniş profilli PR fəaliyyəti də daxildir.
Layihə Azərbaycanın gənclər siyasəti modelinin əcnəbi gənclərə təbliği, bu sahədə birgə gənclər əməkdaşlığı təşəbbüsü, Prezident İlham Əliyevin təsdiq etdiyi "Azərbaycan Gəncliyi 2011-2015-ci illərdə” Dövlət Proqramının və "2015-2025-ci illərdə Azərbaycan Gənclərinin İnkişaf Strategiyası”nın müvafiq tədbirlər planınında nəzərdə tutulan fəaliyyətlərə yönəlməsi baxımından çox əhəmiyyətlidir.
Xeberle.com
Xəbərdən istifadə edərkən istinad etmək vacibdir.