Bu gün Sumqayıtda şəhər Fövqəladə Hallar Komissiyasının qışa, qarlı-çovğunlu günlərə hazırlığın yoxlanılması, avtomobillərin – texnikanın hansı səviyyədə olması ilə bağlı təlimi keçirilib. Şəhər fövqəladə hallar komissiyasının – qərargahın sədri, şəhər icra başçısının birinci müavini Faiq Kərimovun rəhbərliyi altında Təmizlik Departamementinin avtomobil dayanacağında təşkil edilən təlimdə qışa hazırlıq qərargahının üzvlərinin avtomobilləri, müəssisələrə təhkim olunmuş texnika - 37 ədəd özüboşaldan maşın, 17 ədəd ekskavator, 2 ədəd Greder tipli mexanizm, 3 ədəd qartəmizləyən, 2 ədəd duz səpən maşın və digərələri - baxışdan keçirilib. 
Şəhər Təmizlik Departamementinin rəisi Rahim Mustafayev Xeberle.com-a bildirib ki, adıçəkilən təlimin keçirilməsində məqsəd qərargah üzvlərinin və müəssisələrə təhkim olunmuş texnikanın sınaqdan keçirilməsi, həmçinin tez bir zamanda qar yağmış olarsa, havaların soyuması qısa müddətdə baş verərsə, bir neçə saat öncədən siyahı üzrə verilmiş müəssisələrə, yaxud qərargah üzvlərinə qısa müddətdə bu vəziyyətin aradan qaldırlmasına xidmət göstərirdi: "Bu təlim şəhərdə əvvəlki qış fəsillərində yaranan vəziyyətin təkrarlanmaması üçün imkanlarımızın nümayişi, bir yoxlama xarakterli idi. Qeyd edim ki, departamentimizin balansında 3 ədəd qarkürüyən, 2 ədəd duzsəpən, 2 qarın yığılması üçün ekskavator, 4 ədəd də "Kamaz” tipli özüboşaldan texnika var. Bugünkü təlim cənab başçının sərəncamı ilə yaradılmış qərargahın ilk təlimi idi. Hər il müvafiq qərargah mövcud olub, amma təlim formasında bu, il ilk dəfə baş tutdu. Sumqayıtda xidmət idarələrinin hamısı qərargah üzvləridir. İnamla deyə bilərik ki, Sumqayıt qışa hazırdır. Biz təkcə bu texnikalarla qane olmuruq. Hazırda icra başçısının tapşırığına əsasən texnikaların satışı ilə məşğul olan və lizinq yolu ilə texnika verən müəssisələrlə danışıqlar aparılır. Qışa tam hazırlıq məqsədilə şəhərə qartəmizləyən, qarkürüyən maşınlar müvafiq texnikaların alınıb gətirilməsi nəzərdə tutulur”, - deyə departament rəisi söyləyib.

Elnur Ağayev
Xeberle.com