Sorğunun nəticələrinə görə, xalqımız sağlamlığını o qədər də qiymətləndirmir.

 “Pullar hara gedir?” - bizlərdən hər birimizin özünə verdiyi bir sualdır.

 Virtualaz.org bildirir ki, “Exo” qəzeti bununla bağlı sosial sorğu keçirib. Sorğunun nəticələrinə görə, Azərbaycan əhalisinin qazandığı pulların böyük hissəsini qida, alkoqol və siqaretə xərclədiyi məlum olub.

 Bu rəqəm 60% təşkil edib. Kommunal xərclərin ödənilməsi payı ümumi xərclərdə 23%-ə çatıb. Təhsil və əyləncələrə çəkilən xərclər isə cəmi 5%-dir. Vətəndaşlarımız sağlamlıq və tibbi xidmətlərə qazandıqları pulların 2%-ni xərcləyirlər. Eyni məbləğdə pul geyim və ayaqqabıya sərf olunur. Yalnız yerdə qalan 8% pul digər xərclərin qarşılanmasına yönəldilir.

 Maraqlıdır ki, Dövlət Statistika Komitəsi də sorğunun nəticələrini təsdiqləyir.

 Dayanıqlı İqtisadi İnkişaf Mərkəzinin sədri Nəriman Ağayevin sözlərinə görə, sorğunun nəticələri real vəziyyəti əks etdirir.

 Lakin bir “əmma” var – bu məlumatlar yalnız əhalinin aylıq gəlirləri 500 manatı ötən hissəsi üçün düzgündür. Gəlirlərinin səviyyəsi xeyli yüksək olan insanlar üçün dinamika fərqlidir. Bu da anlaşılandır – gəlir çox olduqca, xərclər də artır.