Məlum olduğu kimi, 2 gün öncə Dövlət Neft Şirkətinin (SOCAR) "Günəşli” yatağındakı 10 saylı dərin dəniz özülündə qəzavə yanğın hadisəsi baş verdi. Hazırkı məlumata görə, baş vermiş qəzada 32 nəfər xilas olub, 1 nəfər həlak olub, 30 nəfər isə itkin düşüb.

Dövlətimiz və xalqımız adına olduqca ağrılı hadisə kimi yadda qalacaq bu faciə ilə əlaqədar olaraq Prezident İlham Əliyev sərəncam imzaladı və bu gün rəsmi matəm elan olundu. Sənəddə deyilir:

"2015-ci il dekabrın 4-də Azərbaycan Respublikası Dövlət Neft Şirkətinin "Günəşli" yatağının 10 saylı stasionar dərin dəniz özülündə güclü qasırğanın doğurduğu qəza nəticəsində çoxsaylı insan tələfatı olmuşdur. Xəzər dənizində itkin düşənlərin axtarışı və xilas edilməsi tədbirləri davam etdirilir.

Qəza nəticəsində həlak olanların ailələrinin dərin kədərinə şərik olaraq qərara alıram:

2015-ci il dekabrın 6-da Azərbaycan Respublikasının ərazisində matəm elan edilsin."

***
Bu gün keçirilən mətbuat konfransında SOCAR-ın birinci vitse-prezidenti Xoşbəxt Yusifzadə ictimaiyyəti maraqlandıran bir sıra məsələlərə aydınlıq gətirdi. Sitat: "SOCAR-ın "Günəşli” yatağındakı 10-cu dərin dəniz özülündə baş verən yanğın nəticəsində itkin düşmüş şəxslərin tapılması üçün biz, o cümlədən ölkə başçısının tapşırığına əsasən yaradılan müvafiq komissiyaya daxil olan qurumların nümayəndələri səylərini əsirgəmir”.

"Qaz kəməri güclü küləyə tab gətirməyib söndü. Qəfildən hər yer qaranlığa və alova qərq oldu. Olduqca dəhşətli mənzərədir. Amma bizim əməkdaşlarımız özünü itirmədi və təlimata uyğun hərəkət etdi. Bundan sonra hadisə yerinə xilasedicilər gəldi. Lakin güclü dalğa və alov imkan vermədi ki, xilasedicilər yaxınlaşa bilsinlər. Saat 23:00 radələrində bizim işçilərimizlə dolu qayıqlardan biri dənizə düşdü. Hazırda da onların axtarışları davam edir. 29 nəfər itkin sayılır. Onların tapılması istiqamətində bütün tədbirlər davam edir. Əsas məqsədimiz onları tapmaqdır”, - deyə o bildirib.

X. Yusifzadə bildirib ki, 26 nəfər xilas edilib, Mərkəzi Neftçilər Xəstəxanasına yerləşdirilib: "Bir qismi müalicə onur, bir qismi artıq evə buraxılıb”.

SOCAR-da müşavirə

Dekabrın 6-da Azərbaycan Respublikasının Baş naziri, "Günəşli” yatağının 10 saylı stasionar dərin dəniz özülündə baş vermiş qəza ilə əlaqədar yaradılmış Dövlət Komissiyasının sədri Artur Rasizadə SOCAR-da olub, "Günəşli” yatağındakı 10 saylı stasionar dəniz özülündə baş vermiş qəza ilə əlaqədar müşavirə keçirib.

SOCAR-dan bildiriblər ki, müşavirədə Azərbaycan Respublikasının fövqəladə hallar naziri Kəmaləddin Heydərovun, "Azərbaycan Xəzər Dəniz Gəmiçiliyi” QSC-nin sədri Rauf Vəliyevin, Azərbaycan Respublikası Dövlət Sərhəd Xidmətinin rəisi Elçin Quliyevin, SOCAR-ın prezidenti Rövnəq Abdullayevin qəzanın aradan qaldırılması və itkin düşənlərin axtarışı ilə əlaqədar hesabatları dinlənilib, Baş nazirin sualları cavablandırılıb.

Azərbaycan Respublikasının Baş naziri Artur Rasizadə qəzanın aradan qaldırılması, yanğının söndürülməsi və xilasetmə işlərinin sürətləndirilməsi ilə bağlı aidiyyatı dövlət qurumlarının rəhbərlərinə tapşırıqlar verib.

Təxribat versiyası nə qədər inandırıcıdır?

Hazırda ictimaiyyəti maraqlandıran suallardan biri hadisənin təxribat olub-olmamsı ilə bağlıdır. Hadisə ilə bağlı araşdırımalar indi başladığından bu haqda nəsə demək tezdir. Ancaq hər halda, ən güclü ehtimal odur ki, alovlanma güclü külək nəticəsində başlayıb və təxribat versiyası az inandırıcıdır.

SOCAR-ın birinci vitse-prezidenti Xoşbəxt Yusifzadənin açıqlamasında da bu yanaşma hiss olundu. "Dəniz özülündə baş verən yanğında təxribat görmürəm. Kəmər güclü küləyin təzyiqi altında partlayıb. Təxribatın olmasına şəxsən mən inanmıram”, - deyə o bildirib.

X. Yusifzadə bildirib ki, ölkə başçısının tapşırığına əsasən yaradılan müvafiq komissiyaya Milli Təhlükəsizlik Nazirliyinin rəhbəri də daxildir və bu versiya araşdırılacaq.”

Operativ qəragahdan son durumla bağlı AÇIQLAMA

SOCAR-ın "Günəşli” yatağındakı 10-cu dərin dəniz özülündə baş verən yanğın sabahadək söndürüləcək.

Bunu SOCAR-ın "Azneft” İstehsalat Birliyinin baş mühəndisi Balamirzə Ağarəhimov faciə ilə bağlı təşkil olunan operativ brifinqdə bildirib.

"Saat 17:00-a olan məlumata görə, bütün cəhdlərə baxmayaraq, itkin düşən 29 nəfəri tapmaq mümkün olmayıb. Hazırda Fövqəladə Hallar Nazirliyinin və "Gənclik” İdarəsinin gəmiləri və vertolyotları axtarışları davam etdirir”, - deyə o bildirib.

Baş mühəndis bildirib ki, platformada yanğının söndürülməsi üçün əlavə qüvvələr cəlb olunub. "Xəzər Dəniz Gəmiçiliyi” QSC-yə məxsus gəmi sahəyə gətirilib. "Gəminin üzərinə əlavə texnika qurulub. Artıq mütəxəssislərimiz özülün üzərinə qalxa bilib və hadisəni qiymətləndirirlər. Bundan başqa, müvafiq iş planı hazırlanıb. Texnika yüksək təzyiqli su ilə təmin olunur. Bu gecə və ya sabaha qədər yanğını söndürmək mümkün olacaq”, - deyə o qeyd edib

***

Əlavə edək ki, Dövlət Neft Şirkətinin (SOCAR) vitse-prezidentləri "Günəşli” yatağının 10-cu dərin dəniz özülündə baş vermiş yanğın və qəza nəticəsində xəsarət alanlara Mərkəzi Neftçilər Xəstəxanasında baş çəkiblər.

Vitse- prezidentlər Xalik Məmmədov, Elşad Nəsirov, Bədəl Bədəlov, Tofiq Qəhrəmanov xəstələrin səhhəti ilə maraqlanıb, onlarla bağlı həkimlərdən məlumat alıblar.

Məlumata görə, SOCAR prezidenti Rövnəq Abdullayev isə bir neçə saat öncə hadisə baş verən platformada olub.

Qeyd edək ki, bu gün bu gün Ombudsman Elmira Süleymanova, Azərbaycan Həmkarlar İttifaqları Konfedarasiyasının rəhbəri, millət vəkili Səttar Mehbalıyev, əmək və əhalinin sosial müdafiəsi naziri Səlim Müslümov, səhiyyə naziri Oqtay Şirəliyev, SOCAR rəhbərliyi də xəstələrə baş çəkib.

Xatırladaq ki, qəzada xəsarət almış 8 nəfər hazırda Mərkəzi Neftçilər Xəstəxanasındadır. Onların vəziyyətləri qənaətbəxşdir.

Vüsal Məmmədov

"168 saat”