Dekabrın 9-da Azərbaycan Milli Elmlər Akademiyası (AMEA) rəyasət heyətinin növbəti iclası keçirilib.

Əvvəlcə AMEA-nın prezidenti, akademik Akif Əlizadə gündəlikdəki məsələləri diqqətə çatdırıb.

Sonra Kimya Elmləri Bölməsinin akademik-katibi, akademik Dilqəm Tağıyevin "Sumqayıt Kimya Sənaye Parkının və "Azərikimya” İstehsalat Birliyinin fəaliyyətində AMEA-nın iştirakının genişləndirilməsi perspektivləri” mövzusunda məruzəsi dinlənilib. Prezident İlham Əliyevin AMEA-nın 70 illik yubileyinə həsr olunmuş ümumi yığıncaqda çıxışı zamanı səsləndirdiyi fikirlərini xatırladan akademik Azərbaycan kimya elminin prioritet istiqamətlərindən biri kimi qeyri-neft sektorunun inkişafında və Sumqayıt Kimya Sənaye Parkının yaradılmasında kimyaçı alimlərin iştirakının genişləndirilməsinin qarşıya qoyulan mühüm vəzifələrdən olduğunu vurğulayıb.

Bildirilib ki, bu vəzifənin aktuallığı dünya iqtisadiyyatının hərəkətverici qüvvəsi sayılan texnoparkların və sənaye parklarının iqtisadiyyatın biliklər və innovasiyalar əsasında formalaşmasına, kommersiya məhsuluna çevrilməsinə və elmə ayrılan vəsaitin səmərəliyinin yüksəldilməsinə xidmət etməsi ilə müəyyənləşdirilir.

Sumqayıt Kimya Sənaye Parkının Prezident İlham Əliyevin 2011-ci il 21 dekabr tarixli Sərəncamı ilə yaradıldığını vurğulayan akademik sənaye parkının Azərbaycanda neft-kimya, qeyri-neft sektorunun inkişafında, kimya sənayesinin yaradılması və modelləşdirilməsində aparıcı rol oynadığını diqqətə çatdırıb. Qeyd edilib ki, gələcəkdə bu sənaye parkının tərkibində 40-45 müəssisənin fəaliyyətə başlaması nəzərdə tutulur.

Daha sonra məruzə ətrafında geniş fikir mübadiləsi aparılıb, çıxışlar dinlənilib.

Akademiyanın yeni strukturundan danışan akademik A.Əlizadə bildirib ki, Nazirlər Kabinetinin müvafiq qərar ilə AMEA-nın yeni strukturu təsdiqlənib. Həmin sənədin icrasını təmin etmək məqsədilə rəyasət heyəti qərar qəbul edib.

Eyni zamanda, AMEA-nın "Elm” Nəşriyyat-Poliqrafiya İdarəsinin "Elm” Nəşriyyatı adlandırılması qərara alınıb.

Tədbirdə 2016-2017-ci tədris ili üzrə AMEA-nın magistraturasına qəbul planı və AMEA-nın elmi müəssisələrinin magistraturalarında saathesabı tədris edən müəllimlərin vəzifə maaşlarına əlavələrin verilməsi haqqında qərarlar qəbul olunub.

Növbəti məsələ akademik İsmayıl İbrahimovun 100 illik yubileyinin qeyd edilməsi barədə olub. Alimin yubileyinin AMEA rəyasət heyətində keçirilməsi, onun həyat və fəaliyyətini əks etdirən silsilə məlumatların kütləvi informasiya vasitələrində dərc olunması qərara alınıb.

İclasda bir sıra kadr məsələlərinə də baxılıb. (AZƏRTAC)