"Mərhəmətli olmağa tələsin!” devizi altında keçirilən xeyriyyə aksiyasına yekun vurulub.

"Azərikimya” İstehsalat Birliyi və Qızıl Aypara Cəmiyyəti Sumqayıt şəhər bölməsinin birgə təşkilatçılığı ilə bir ay bundan öncə birliyin akt zalında startı verilən "Mərhəmətli olmağa tələsin!” xeyriyyə aksiyasına yekun vurulub. Xeberle.com-a verilən məlumata görə, tədbirdə «Azərikimya» İstehsalat Birliyinin Müşahidə Şurasının sədri, Milli Məclisin deputatı Muxtar Babayev, Birliyin ayrı-ayrı müəssisələrinin işçiləri və aksiyaya qoşulan digər təşkilatların nümayəndələri iştirak ediblər.

Tədbiri giriş sözü ilə "Azərikimya” İB-nın Mətbuat katibi Rafiq Oday açaraq tədbir iştirakçılarını salamlayıb.

Sonra çıxış edən QAC Sumqayıt şəhər bölməsinin sədri Mətanət Məhərrəmova artıq ənənə halını almış aksiyaya fəal şəkildə qatılan təşkilatların nümayəndələrinə minnətdarlığını bildirib.

«Azərikimya» İstehsalat Birliyinin Müşahidə Şurasının sədri, Milli Məclisin deputatı Muxtar Babayev qarşıdan gələn "Dünya Azərbaycanlılarının həmrəylik günü” və Yeni il münasibəti ilə uşaqları təbrik edib və onlara dərslərində müvəffəqiyyətlər arzulayıb.

Aksiyada fəal iştirakı ilə seçilən idarə və müəssisələrin nümayəndələrinə göstərdikləri dəstəyə görə "Təşəkkürnamə”lər təqdim olunub.

Aksiyada Sumqayıtın bütün ümumtəhsil müəssisələrindən təhsil alan hər iki valideynini itirmiş şagirdlər, "Sağlamlıq imkanları məhdud olan uşaqlar üçün xüsusi tipli internat məktəbi”nin ehtiyaclı uşaqları şagirdləri və QAC Sumqayıt şəhər bölməsinin qeydiyyatında olan əlil ve imkansız uşaqların isti qış geyimləri ilə təmin olunması nəzərdə tutulub.

Qeyd edək ki, "Azərikimya” İB, "Azərtexnolayn” MMC, Xəzər SC, Paşa Həyat Sığorta, Rahat Marketlər şəbəkəsi, Delta Qrup, Sumqayıt Dövlət Universiteti, "Sumqayıt” Peşəkar Futbol Klubu, Alyans Tekstil Fabriki, Karbomid zavodu geyimlərin alınmasında fəal iştirak ediblər. Həmin təşkilatların nümayəndələrinin iştirakı ilə geyim əşyaları uşaqlara tədqim olunub.

Sonra geyimlərin paylanmasını QAC Sumqayıt şəhər bölməsinin könüllüləri davam etdiriblər. Bir ay ərzində davam edən aksiyada yekun olaraq 200 nəfərə qədər uşağa isti qış geyimləri paylanıb.

Tədbirdə iştirak edə bilməyən sağlamlıq imkanları məhdud olan uşaqlara isti qış geyimləri evlərində çatdırılıb.